AAP MLA temi Tir Murmu den ‘Operation Lotus’ indang jembitsü

New Delhi, September 2, 2022 (Agencies): Aam Aadmi Party (AAP) lennirtem aser MLA tem adenba teshimtet telok kati Tir Droupadi Murmu den ajurutepa BJP indang ‘Operation Lotus’ anema ken o ka benoktsü mapang meshiogo.

“India democracy kümzüka ayur Tir dang ni mapang meshiogo. AAP MLA teshimtet telok kati la den ‘Operation Lotus’ indang jembinür, iba ajanga BJP-i linük ajungalen state sorkartem atsüngdoker. BJP-i sorkartem atsüngdoktsü atema state balala nung MLA 277 tashi alizükogo aser parnok sorkar kümogo” ta Kalkaji nungi MLA Atishi-i ashi.

“BJP-i AAP MLA 40 alizüktsü merang. Tir den senden nung AAP-i BJP campaign anema ken o ka benoktsü aser parnoki sen aika bendenba atema bushisüngdangtsü takhangba agütsütsü” ta laisa ashi.

“Akhümtsübua aliba Tir-i September 7 nü onok den ajuruteptsü mapang agütsüba tepela osang lemsateper. Onoki ‘Operation Lotus’ indang jembitsü atema la dang mapang meshi, iba ya India nung democracy atema lendong tulu ka lir” ta MLA Atishi-isa tanü anüngdang metetdaktsü.

Bodbarnü AAP MLA temi CBI headquarters kima nung ghonda ana mener lungkak ait aser iba ya BJP anema ken o ka benoktsü atema liasü.

Delhi Deputy Chief Minister Manish Sisodia dena AAP MLA tem shia dang BJP nung adentsü atema Rs 20 crore agütsütsü nangzük aser CBI o ED ajanga bushisüngdang südaktsütsü ta amokmeren ta taoba mapang AAP-i metetdaktsüogo.

Külen, BJP Delhi MP temia Delhi Lieutenant Governor Vinai Kumar Saxena dang AAP-i parnok dak tai tongloktsüba atema bushisüngdang asütsü mepishiogo.