AAP Nagaland-i NPF yaritsü asoshi telemtetba kecha magi

Dimapur, Monupii (May) 25 (TYO): AAP Nagaland-i NPF rally nung aden aser Lok Sabha candidate yaritsü atema nungiter ta NPF-i May 25, 2018 nü sangdong ka agütsübaji tai lir ta Aam Aadmi Party Nagaland State convenor, Dr. Amos Lkr-i tanü ashi.
AAP Nagaland-i NPF nung adentsü mesüra NPF rally nung shilem agitsü telemtetba kecha magi. Akavi Zhimomi-i pa nija tangatetba nung Dr. Liezietsu den ajurutep aser May 24, 2018 nü Dimapur nung agiba NPF rally nunga aden. Ajisüaka, AAP nung Party Working President ta asüba mapa mali aser Akavi Zhimomi-i ashiba State convener tanga shinga mali, ta Dr. Amos-isa shisem.
Akavi ji Ghaspani 1 Constituency nungi AAP ex-candidate ka lir saka pai NPF mesüra tanga political party den ajurutepaji AAP Nagaland tenüng nung masü saka pa kija atema aser kija ajangzüktsü atema dang lir. Anungji, AAP Nagaland-i NPF den longjemogo ta media nung osang prokshibaji tiyazü lir aser pei ajangzüktsü atema AAP Nagaland tenüng menüktsür anema onok longjema lir, ta paisa metetdaktsü.
AAP Nagaland nung convenor ka Dr. S. Amos Lkr aser Spokesperson ka, Dr. L. Chuhwanglim na dang lir aser tena den executive members 13 ji May 17, 2016 nü AAP central body-i shimba lir. AAP central body shimba dak alia nisung kari convener aser executive member tem ta tenüng agia jembibaji pa/la sasa tenüng menüker dang asütsü. Iba ama nisungji tarutsü nung AAP tenüng nung shilem magidaktsütsü, ta state convenor-isa sangdong nung ashi.
NPF-i AAP party executives den official süa senden mamen tashi NPF-i AAP tenüng mamshitsü ayongzüker. Pei ajangzüktsü atema NPF nung adenertemji AAP tenüng nung masü aser ibaji Central body AAP party office-i tetuyuba agütsüogo, ta paisa ashi.
Maneni, May 18, 2018 nü osangkakettem nung AAP State Convenor mapa nungi anentsür ta asüba aser ozüng alema Spokesperson Dr. Lemwang Chuhwanglim jaokbaji National Convenor office Delhi-i magizüker, ta metetdaktsüogo.
National Convenor office nungi email aruba nung ajemdaker State Executive body AAP Nagaland-i party nungi anenja aliba züngsemtem nem maongka ka agütsür, ta Dr. S. Amos-i tanga sangdong ka nung metetdaktsü.
Party nungi temelaba magii NPF pusemtsü lemtetba aser sendentem amenbaji party tashi mangaba lir. Tarutsü nungbo iba mesükba mapa meinyaktsü tetuyuba agütsür aser inyakra disciplinary action agitsü, ta paisa shisem.