AAP nem tenla agüjang: CM Kejriwal

New Delhi, July 14 (Agencies): Tanü Delhi Chief Minister Arvind Kejriwal-i AAP senotsü temogo ta shia nüburtem dang, party nüngdak nung amshitsü ajanga senotsü tenla agüjang ta mepishiogo.

Party-i nüburtem dang tenla meshiba meraji metenja Kejriwal-i, AAP-i ochimashiba lenmang nungi party senpong mesüngner aser party-i yimtenren temerük asoshi nangzükba nungi masetshiner, ta ashi.

“Sorkar akümba sülen party ket nung aliba senotsü ajak temogo. Anogoshia party maparen balala inyaktsü asoshi onoki senotsü nüngdaker,” ta Kejriwal-i ashi.

“Chief minister akümba sülena sen meshir. CM yabo balaka, ta nenoki bilema alitsüa akok. Saka kuliji yamai lir. Ochimashiba tsütsülen nungi sen amshidi süra ni inyaker alitsü asü aser mepishia meshitsü nüngdak madoktsü. Ajisüaka ochimashiba lenmang nungi ibaji inyaktsü ni memelunger,” ta pai ashi.

Taküm election agiba mapang party dangi senotsü aruba dak sentakba nung Kejriwal-i, “Nüburtemi onok nem tenla agütsü, onoki mimshia sen magizük. Senpak ka agizükba densema record nung lir,” ta pai ashi.

Kejriwal-i nüburtem dang, senpak 10 tenla agütsüyonga kecha masü ta shiogo.

“Onok nem tenla agüjang kechiyong nai sen 10 tenlabaji ajanga onoki ochi nung inyaktettsü,” ta paisa ashi.