AAP state executive senden amen

Dimapur, September 28 (TYO): Aam Aadmi Party State Executive Meeting September 27, 2017 nü 4th Mile, Diphupar nung party Convener, Dr. S. Amos Lkr’er kidang menogo, aser iba senden nung district balala nungi state level lenirtem dena liasü.
Senden nung party züngsemtemi benokba onük balala nung o tatsü-talang ajak asadang jembiba sülen telemtetba kar agia liasü.
Senden nung party-i, paper mill onük atema tongtibang süa inyaktsü, employees nem itasen/bills magütsüi aliba tangsa agütsütsü atema temepishiba shidi ka agütsütsü aser paper mill asentenshitsü atema inyaktsü lemtet, ta tanü party Convener, Dr. S. Amos Lkr-i sangdong ka ajanga metetdaktsü.
Iba dak alia tekaraba nung State Convention ka ayongzüktsü, iba sülen district balala sema senzütsü lemtet.
Iba senden ya executive züngsemtem leniba nung agi aser State Women Wing Tir, Wt. Vitoli Yeptho-i sarasadema liasü.
Party-isa sorkar dang, state sorkari item atemaji meinyakra party-i paper mill onük nung longkak aittsü, kechiyong iba ya nübur aika taküm alitsü atema lir aser kiyim lanurtem atema mapa angudak tiyongtsü ka lir, ta metetdaktsü.
Party-isa kaketshirtem nem scholarships magütsüi aliba atema-a inyaktsü.
Senden nungsa grass root level nung party tashi itshitsü, iba den külemi taruba General election nung Tsüngrem tsübuba ochishir candidate tem shimtsü atema inyaktsü lemtet, ta kasa sangdong ajangasa metetdaktsü.