AAPSU-i Arunachal sorkar dang refugee bill yanglutsü akhanger

Itanagar, December 14 (Agencies) : Arunachal Pradesh assembly senden nung sorkari Chakma-Hajong refugee onük benoka mejembira All Arunachal Pradesh Students’ Union-i senden magidaktsüi lungkak aittsü ta metetdaktsü.
Sorkari iba onük atema süoki ia mebilemer ta AAPSU-i ashir aser tang Arunachal nung Angh J P Rajkhowa indang ashishitep ken o adoka aliba mapang ka nung parnoki Chakma-Hajong refugee onük benokogo.
“Sorkari state nung refugee tem noktangtsü atema ozüng ka meyanglu tashi onoki assembly session magidaktsüi noktangtsü” ta Aapsu president, Kamta Lapung-i osangbener dang ashi.
Hokolbarnü Aapsu Sanen Luden senden ka ayongzüka agi aser iba mapang parnoki sorkar dang refugee aliba onük atema ozüng yanglutsü takhangba agütsütsü telemtetba agia liasü.