AAPSU-i ‘Operation Clean Drive’ tanabuba shilem tenzüktsü

Itanagar, Luroi (August) 24 (Agencies): All Arunachal Pradesh Students’ Union (AAPSU)-i ‘Operation Clean Drive’ shilem tanabuba tenzüktsü sentong lir.
Assam nung National Register of Citizens (NRC) final draft sayaba sülen AAPSU-i August 17 nü iba mapa tenzük aser taoba Deobarnü anena atatsü lemtet.
Anogo ananü parnoki iba mapa inyakdang Inner Line Permit (ILP) malir nisung 2,205 tashi putet aser parnok Arunachal nungi meindok. Iba ya meinyakdang Aapsu-i kulikaket malirtem state toktsür aotsü tetuyuba ka jelia agütsür liasü.
“Bendangertem aruba aser aoba junga merepranger. Anogo ananü mapa inyakdang onoki administration aser police-i timi meinyakba ajitet” ta Aapsu ILP Issue Committee mendenbuba Tatung Taga-i osangbener dang ashi.
“Tanabuba shilem yakta tenzüktsü” ta paisa ashi.
Taruba ”Operation Clean Drive’ metenzükdang onoki ILP malirtem dang state toktsür aotsü atema osang sangoktsütsü ta paisa shisem.
“Arunachal Pradesh nung lisopurtem kümzüktsü atema onoki maneni iba mapa inyaktsü. State nungi meindokertem tanaben kulikaket melii marudaktsütsü” ta paisa metetdaktsü.
“Arunachal Pradesh-i tebilemtsü aika ajurua lir, ozüng alema arurtem, oshi, litsü dak sendakba khuret aika lir. Aapsu-i state aser nübortem kümzüka ayutsü atema akokba tashi mapa inyaktsü” ta Tatung Taga-isa ashi.
“ILP malir aika sorkar ketdangser, yimsüsür aser tongtipang nisungtem kidang apu” ta paisa shisem.