AAPSU-i Rajnath nem Memorandum agütsü

New Delhi, May 12 (Agencies): Hokolbarnü All Arunachal Pradesh Students’ Union (AAPSU) tir Hawa Bagang lenisüba kübok telok kati New Delhi nung Union Home Minister, Rajnath Singh den ajurutep.
AAPSU teshimtet telok jagi Rajnath nem tezüluba ka agütsü aser iba nung India sorkar aser NSCN-IM tsüngda “Framework Agreement”, Arunachal atema Governor balaka shimtsü, Chakma Hajong tebilemtsü aser tekaratiba nung Assam-Arunachal arrtsü ladangtsü indang onüktem shia lir.
New Delhi aser NSCN (IM) tsüngda telemtetba tajung ka agitsü atema yimjung olemtep agiba pelashishia agizüker, saka iba telemtetba agiba nung India sorkari Arunachal litsü tilaka danga kongshira, onoki khukhua anemtsü, ta AAPSU-i tezüluba agütsüba nung shia lir.
Arunachal Pradesh indang litsüji kanga tongtipang anungji Centre sorkari tashishi melii telemtetba agitsü aser iba dak sendakba onük nung sendaktepa alirtem ajak den asüngdangya inyaksangshitsüla. Aji mesüra, tetsükdaktsü tulu ajurutsü aser NSCN-IM den yimjung olemtep liyonga aruba ajakji amajok akümtsü, ta parnokisa Rajnath Singh dang metetdaktsü.
Iba dak sendakba nung Rajnath-i ashiba agi, NSCN (IM) den telemtetba agira ibaji sendaktepa alirtem ajaki haihaura aser temoatsü agüja agiba asütsü aser shinga alema telemtetba magitsü.
Ministry-i iba tebilemtsü asoshi nübortem taginüba aser tebilembatem kanga junga meteta lir, ta Home Minister-isa AAPSU lennirtem dang ashi.
Arunachal Pradesh atema Angh balaka shimtsü indang onük atema Rajnath-isa ashiba agi, Prime Minister-i iba mapa inyaktsü aser kobi melii Angh balaka mapa lemzüktsütsü.
“Assam-Arunachal arrtsü onük angatetteptsü atema tanga ya mapang tajung ka lir, kechiyong state anaprong BJP sorkartem lir” ta paisa shisem.