AASU-i Citizenship Act anema longkak aittsü

Guwahati, October 17 (Agencies): Centre sorkari Citizenship Act ozüng yanglushitsü atema mera agiba ashishia Hombarnü All Assam Students Union (AASU)-i, iba onük anema longkak aittsü ta amokmerenogo.
Kaketshir tentet, AASU-i, Mongolbarnü parnoki Assam nung district ajak aser subdivisional headquarters nung candlelight processions ayongzüka akatsü, ta ashi.
Parnokisa October 22, 2016 nü Guwahati nung lokti senden ka ayongzüktsü, aser iba senden nung telemtetba kar agitsü, ta metetdaktsüogo.
AASU lenir, Samujjal Bhattacharyya-i, 1971 küm sülen Assam telungi aiter Bangladesh nunger Hindu tem anioktsü atema Centre sorkari mera agiba anema longkak tesashiba aittsü, ta nangzükogo.
“Onoki iba ya Assam sorkar aser Centre sorkar na nem jungjunga angatetdaktsüner- ozüng alema arua Assam nung alir bendangertem onükji Assam Accord nung ajemdaker bentettsüla,” ta ASSU-isa ashi.
Assam Accord tezüngzüktep ya 1985 küm Central sorkar aser AASU o All Assam Gana Sangram Parishad lenirtem na tsüngda agia liasü.
“Iba Accord nung, 1971 küm sülen Assam-i arua alir Hindu mesüra Muslim nunger ajak meyipa oadoktsüla,” ta Bhattacharyya-i ashi.
“1971 küm masüdang arua alir Bangladesh nunger ajanga Assam-i khuret ajura lir. Küm trok tashi longkak aitba sülen Assam Accord tezüngzüktep ya agi. Centre-i iba tezüngzüktepji akhümtsübutsüla, kechiyong ibaji linük teinyaktsü mapa lir,” ta apisa shi.
Assam nung lokti tentet 28-i kobi melii longkak tulu ait tenzüktsü, koba ajanga Centre-i agiba mera anema nüburtemi telemtet ka agitsü, ta paisa metetdaktsü.