AASU-i citizenship(Amendment) Bill 2016 agintsü akhang

Guwahati, July 21 (Agencies): Brehostibarnü All Assam Students Union (AASU)-i Ato kilonser Narendra Modi dang 2016 küm Citizenship (Amendment) Bill benokdanga aliba agintsü asoshi khangogo, koba taruba Parliament senden nung benoktsü asoshi renema lir.
AASU sangdong ka ajanga ashiba agi, Joint Parliamentary Committee (JPC) kati nüburtem tebilemba angadangtsü asoshi state semdangtsüba liasü, saka mapang mesütepba ajanga mesemdangtet aser tang nüburtem tebilemba mangadangi dang sorkari Bangladeshi Hindu nunger temnem lisopur jenjang agütsütsü asoshi lenmang lapoktsütsü atema iba bill Parliament nung benoktsü asoshi sentong yangludar.
Citizenship (Amendment) Bill, 2016 ya Modi-i aniba sorkari 2014 kü mezüng asadanga liasü. Bengali Hindus nungertem nem dang masü saka Pakistan aser Afghanistan nungi tamangba yimsü dak sendakba nung rishi kangshiba ajanga jena arur India nung jenoka alir Hindu, Parsi, Christian, Buddhist aser Sikh nunger temnem India lisopur jenjang agütsütsü asoshi iba bill ajanga asadanger.
AASU puri PM dang asüngdangbaji, kechiba parnoki tenangzükba agütsüba sülena JPC puri nüburtem tebilemba angadangtsü asoshi Assam mesemdang.
Centre-i nüburtem tebilemba angadangtsü asoshi taoba Mumbai Police Commissioner aser Baghpat Lok Sabha constituency (Uttar Pradesh) BJP representative Satyapal Singh lenisüba kübok Joint Parliamentary Committee ka kümteja liasü.
Iba committee yagi Assam taoba küm November 2 aser 3 nung semdangtsüba liasü, saka Dhemaji Lok Sabha seat atema by-election aliba ajanga iba sentong thinen, saka iba sülen committee puri Assam mesemdang.
“Assam amala state tila kati 1971 sülen arur bendanger khuret mebentettsü. State nung bendanger dak sendakba ken o Assam Accord nung aliba ama mapa küma inyaktsüla,” ta AASU tir Dipanka Kumar Nath aser general secretary Lurinjyoti Gogoi nati külem sangdong ka nung metetdaktsü.
Parnokisa ashiba agi, AASU puri iba ken o nungita joint parliamentary panel matsüngdang New Delhi nung iba ken o angadangba mapang kuli tejangja agütsüogo.
Sorkai Assam Accord raksaa iba telemtetba agira kaketshir tenteti assam ajunga nung longkak aitba sentong ayongzüktsü, ta amokmeren.
Assam nung ozüng alema küli kaket tejangja makai Bangladesh, Pakistan nungi nüjiso anguba sülen 1971 küm nungi India nung arur alirtem raktoktsü asoshi National Register of Citizens (NRC) inyakyim tenzüka inyakdar.
1985 küm Assam Accord kulizüngtepa ayuba nung 1971 March 24 ayaterem tashi nung Bangladesh nungi Assam-i arur alirtem nem lisopur jenjang agütsütsü.