AASU lennirtemi Modi den ajurutep

Guwahati, January 20 (Agencies) : 2014 Lok Sabha election matongdang Prime Minister Narendra Modi-i northeast nunger dang nangzükba ama inyakang ta Mongulbarnü All Assam Students’ Union (Aasu)-i takhangba agütsü.
Guwahati airport nung Modi den ajurutepba sülen Aasu lennirtemi ashiba agi, parnoki Assam nung lisopurtem kümzüka ayutsü atema ozüngtem yanglutsü takhangba agütsü.
Aasu-i Assam Accord mapa küma inyakdaktsünür. Onoki Prime Minister nem Bangladesh nung ozüng alema aruba khuret reprangshimdaktsünür, ta Aasu Chief adviser, Samujjal Bhattacharyya-i osangbener dang ashi.
Ano külen, Modi-i Assam semdangba anema Krishak Mukti Sangram Samiti (KMSS) aser All Bodo Students’ Union (Absu) temi lungkak aitba sentongtem ayongzüka agi.
Absu, National Democratic Front of Bodoland (Progressive) aser Joint Action Committee for Bodoland Movement nungeri Udalguri nung ghonda asem lungkak aita liasü. Iba kasa mapang nung Modi-i Kokrajhar nung rally ka nung aden.
“Taoba Lok Sabha election mapang Modi-i Assam semdang aser onok nem statehood agütsütsü ta nangzük. Ajisüaka parnok sorkar tashi anguba sülen, pai iba onük atema ola madoki kümogo” ta Absu president Pramod Boro-i osangbener dang ashi.