AASU puri Amungnü BTAD tekolakba Mohilary den senden ka kaogo

Guwahati, Metsüremi 19 (Agencies): All Assam Students’ Union puri Amungnü Bodoland Territorial Council tekolakba Hagrama Mohilary dang Bodoland Territorial Area District tem nung aliba kin ajak indang ali temeden kümzüka ayutsü asoshi shiogo.
AASU tir Dipanka Kumar Nath, general secretary Lurin Jyoti Gogoi aser adviser Samujjal Kumar Bhattacharjya nungeri Amungnü Guwahati nung Mohilary aser council züngsem tem den senden ka kaa liasü.
Kin balala nungi loktitentet, Rajbongshis, Adivasis, Gorkhas aser Nath Yogis nungeri BTC administration-i parnok ket nungi ali temeden agintsüba atema benokdangba anema longkak aitba sentong aika ayongzüka kaogo.
AASU sangdong ka ajanga ashiba agi, iba senden ya tangatettep nung kaogo aser parnoki Mohilary nem tezüluba nung takhangba ka agütsüogo. Bodo kin takhangba bentettsü asoshi 2003 küm BTC Accord sign süa aliba parnokia puasemer, ta Mohilary dang parnoki ashi.
Ajisüaka kaketshir lokti tentet-i, BTC administration-i nüburtem mebendangi kasa dang benshitsüla ta shiogo.
Kasa sangdong ajangasa ashiba agi, iba senden nung Mohilary-i parnok dang kin ajak indang ali temeden kümzüka ayutsüba nangzükogo aser council, cabinet-i Tentonü telemtetba agitsü, ta shiogo.
AASU-i Mohilary dang BTAD kübok sorka meyong aser nija institution kari Assamess oshi ajungkettsüba atema jenjang tapet magir, ta shiogo.
Parnokisa ashiba agi, parnoki Assamese aser Bodo oshi anaprongla school tem nung ajungketner.