AASU züngsemtemi lungkak ait; NH 31 mokdang

Guwahati/Bajali, January 29 (Agencies): Nalbari nung police station ka nung BJP züngsemtemi All Assam Students’ Union (AASU) züngsemtem dak teka sangshiba anema AASU-i tanü Assam kübok National Highway ajak mokdang.
Citizenship (Amendment) Bill, 2016 anema lungkak aitba tagidak mapang ka nung January 27, 2019 nü Nalbari nung AASU aser Bharatiya Janata Party (BJP) züngsemtem tsüngda raratep.
Swahid Bhavan nung osangbener senden ka amendang AASA indang chief adviser Dr Samujjal Kumar Bhattacharya-i iba tatalokba aitsü aser BJP dang timtem tulu ajurutsü ta kümdangtsü osang metetdaktsü.
“AASU züngsem shia dak teka aiba atema sorkar aser BJP nem telangzüba agütsütsü. Shinga mejenbutsü” ta Bhattacharya-i ashi.
Nalabari district police-i BJP aser RSS ajanga tuyubatem ama inyaker, ta paisa shisem.
NESO chairman Jerwa-ia osangbener dang ashiba agi, Northeast India ajungalen Citizenship (Amendment) Bill, 2016 anema lungkak aitba manentsü.
Iba osangbener senden nung All Assam Tea Tribes Students’ Association, All Moran Students’ Union aser tanga teloktem aden aser parnokia AASU züngsemtem dak teka sangsihiba aitsü
Tanü AASU kübok All Barpeta District Students’ Union-i tanü Pathsala traffic point nung National Highway No 31 mokdang.
Parnoki BJP sorkar anema yimyimtem ayim aser Nalbari nung AASU züngsemtem dak teka ayirtem aputsü atema takhangba agütsü.
January 27 nü AASU züngsemtemi Citizenship (Amendment) Bill, 2016 anemba sayua Assam Transport Minister Chandra Mohan Patowary dak wako tanak ayiploktsü.
Iba mapang AASU aser BJP züngsemtem tsüngda mangatettep adok. Idangji BJP züngsemtemi AASU wako sensamasatsü ta AASU-i ashir.
Police-i AASU züngsemtem apu aser police station nung parnok dak BJP züngsemtemi züka merenshi.
Barpeta district AASU unit secretary Samudra Patgiri-i ashiba agi, AASU indang central committee-i Citizenship (Amendment) Bill agienang ta takhangba agütsütsü tuyuba ama iba mapa inyak.
Paisa ashiba agi, sorkari tekaratiba nung iba bill meyipa magira timtem tulu ajurutsü.
Nalbari nung atalokba sülen AASU züngsemtemi Assam kübok tesem balala nung BJP anema lungkak aityonga arur.
Mongulbarnü AASU züngsemtemi Guwahati nung Basistha Chariali nungi Jalukbari point tashi national Highway bypass mokdanga liasü.