AB de Villiers PSL 2019 nung shilem magitsü

Metsüremi/March 4, 2019 (Agencies): South Africa nunger nüngtugu asayar AB de Villiers, teberem yiruba ajanga PSL 2019 nung shilem magitettsü.
PSL, UAE leg March 5 nü tembangtsü aser iba sülen last four group match, qualifier aser final Karachi nung March 9 nü nungi tenzüka asayatsü.
Iba osang jangjashija de Villiers-i ashiba agi, “Pakistan nunger cricket fan tem matsüngdang masayatetba atema ni kanga tezü adanger. Ni kü doctor den ajurutepogo aser pai ni hopta ana anisüngzüktsü asoshi tetuyuba agütsü aser tiamaka iba ajanga ni Karachi nung masayatettsüsa akümer.”
“Taruba küm PSL nung asayatsü imlaa atar. Taküm iba asayamung akoktsü atema Lahore Qalandars pur pusema atar,” ta pai ashi.
Kasa mapang nung Lahore Qalandars manager Sameen Rana-isa iba osang jangjashitsüogo. “Lahore Qalandars management aser fan tem atema kanga tezüdangtsüka AB de Villiers PSL, Pakistan leg nung masayatettsü,” ta pai metetdaktsü.
“Pa melena asayartem shimra mapantong nung metetdaktsütsü,” ta paisa ashi.
Taoba mapang nung De Villiers-i, pa Lahore Qalandars nungi Lahor nung March 9 aser 10 nü asayatsü ta shia liasü. Paisa Pakistani meyipa arua asayaba sülen international cricket nung pai shilem agitsü lir ta shia de Villiers BBC World Service’s Stumped programme dang ashiba agi, “Ni international cricket nem teyari agütsütsü atema iba maongka ya angu ta bilemer,” ta paisa ashi.
“Küm ishika tejakdang ni Pakistan-i oa asayatsü nongnanga liasü aser iba mapang nung asenok ajak atsüayonga liasü, saka iba linük nung oa asayatsü tang ya mapang shidak ta bilemer,” ta AB de Villiers-i ashi.