Abadi-i benokba temelenshitsü agitsü onük Parliament-i agizüker

Baghdad, August 11 (Agencies): Iraq Parliament-i par Ato Kilonser, Haider al-Abadi-i benokba temelenshi agitsü onük tanü Mongolbar nü agizükogo.

Iraq’er Vice President menden 3 aser deputy prime minister menden 1 agientsü densema par sorkari ochimashi inyakba aser senotsü tali indokba nokdangtsü asoshi nungdakba temelenshi agitsü atema Abadi-i taoba Deobar nü onük benoka liasü.

Ano, sorkar ketdangsertem shimba maparen nung yimtenren telok aser kin balala nungi züngsemtem asoshi menden mekazüka ayubaren agientsü aser tongti ketdangsertem taküm kümzüka ayutsü asoshi tanükertem tajemba agütsütsü onüka Abadi-i benokba osang jangjaogo.

Sorkar tashi dak ajemdaker ketdangser aser yimsüsürtemi ozüng alema ochimashi inyakba bushisüngdangtsü asoshi nungdakba maparen tenzüktsü asoshia par lenisangi onük benoka liasü.

Aji oda, Parliament züngsemtemi Abadi-i benokba onüktemji kanga junga shisadanger külen pai benokba onüktemji agizüka par Iraq nung nungdakba temelenshi agitsü asoshi tanü telemtetba agir lir.

Iraq sorkari par linük indang senotsü junga ketdang masüba aser electric tashi junga magütsüba densema nüburtemi nungdakba maparen junga meinyaktsüba anema longkak aitba khuret hopta ishika ajurua arur külen tan temelenshi agitsü onük ya agizükogo.

“Iraq nung ochimashi inyakba nokdangtsü asoshi nungdakba maparen tang dang nungi tesashiba inyaktsü asoshi Abadi ajungshir,” ta Iraq’er Supreme Leader, Grand Ayatollah Ali al-Sistani-ia tanü metetdaktsüogo.