ABAM ajanga COVID-19 dak sendakba ola:

Tanü alima hopta ishika teimla makai shirangba mapang ka nung, meimchirtemi joko temaba tashi ka ajanga dang koktettsü südi ta angateta aruba mapang ka lir. Tashi tait kin tem-a iba tashidak agi tonga taneptsü mozü  tejangja monguteti  ratamatar. Meimchirtemi asen tashi kangadang temesü aser auyi dang akümtsü takümtem ta angateta Tsüngremi dang koktettsü sudi ta rajema arur. Yamala mapang ka nung Khristan-temi teyanglur Tsüngrem dang ola yoka alima dang asen Tsüngrem taküm lir ta sayutsü mapang tajung ka lir.Tanü alima hopta ishika teimla makai shirangba mapang ka nung, meimchirtemi joko temaba tashi ka ajanga dang koktettsü südi ta angateta aruba mapang ka lir. Tashi tait kin tem-a iba tashidak agi tonga taneptsü mozü  tejangja monguteti  ratamatar. Meimchirtemi asen tashi kangadang temesü aser auyi dang akümtsü takümtem ta angateta Tsüngremi dang koktettsü sudi ta rajema arur. Yamala mapang ka nung Khristan-temi teyanglur Tsüngrem dang ola yoka alima dang asen Tsüngrem taküm lir ta sayutsü mapang tajung ka lir.
Tanü alima rangben tashitak COVID-19 koba meyimlai kanga kera menatepa aor iba ajanga asenok taküm alitsü ang süngla temesü akümba  asenoki angur. Iba tia angateta ABAM ajanga ayonga March 23, 2020 anogo ABAM Lim arogotem ajak nung sarasadem agiogo aser ano maneni Tsüngrem nungi tenokdangba meshia ano tashitak agi tonga alirtem, tasürtem aser lokti kobaisa iba wara nungi kümzüka alitsü mapang aben tinyaktsütem aser sentong balala agir  parnok den asenok ajaki iba tongpang raratsü ta tenangzükba akanga yua lir.
Iba dak sendakba mapa nung ABAM ajanga amangbapur ajak dang temulung mademi tamanger tajung ka ama tamang agi Tsüngrem dang maneni sarasademtsü aser senso tajung ka ama World Health Organization (WHO), Ministry of Health and Family Welfare government of India aser telatetba agütsür lokti balalai tetuyuba agütsüba nung tashi anga anidaktsü la ta kümzüka alitsü asoshi ayongzüker.
Sorkar ajanga osang tejangja ka magütsü tashi ajak kümzüka alitsü asoshi lokti balalai tetuyuba agütsüba inyakba den repsema ABAM ajanga tamangertem asoshi arogo teinyaktsü lenisüba kar agütsür:
1.      Sentep ajak metitemi agitsü, saka tensai memelara pei tesem den abet agitsü.
2.      Deobar school aser tanurtem sentep agitsü akok saka tensa apir tiena atatsü asoshi Lim arogoi achaayangtsü.
3.      ABAM calendar nung aliba sentongtem ajak teina atar aser Lim arogo nung sentongtem asoshi arogoi kanga shisadanga kümdanga agitsü ajungshir, kokra teina atatsü.
4.      Tantsür tamburtem lokti sentep nung meteni alitsü kechiaser temetetertemi ashi ama parnok dak iba wara timba atonger.
5.      COVID-19 wara dak aketba yimya kar dak tongra lokti kümzüka ayutsü asoshi pa/la lokti sentep nung matentsü. Tekeraba nung mozüki bushiang.
6.      Nübur shir tezü nungi arua/arur ali pa/la pei sasa lokti/kinungertem nungi atsüngzüka alitsüla mesüra sorkar/lokti balalai achaayanga lira iba tesemi aotsüla.
7.      Lokti senden  nungi pila kümzüka alitsü asoshi Impur nung kija aser lokti asoshi koba Museum, Pilgrim’s park, tanenzükdak ki,  anenzüka noksa agiba ano aika., itemji mapang tatsü ka asoshi shibanga atar.Asenoki akokba tashi kümzüka alitsü mera agiba mapang ABAM ajanga amangbapur tem ajak dang maneni asenok kümzüka ayutsü asoshi aser iba wara alima nungi ageinang ta sarasademtsü  ayongzüker. Asen Tsüngrem ya taneptsür Tsüngrem lir Anitet 15:26 “… kechiaser na anebtsüba Kibubaji ni lir” ano Job 5:18 nung ashir “ kechiaser pai ayako tendaktsür, aser paisa anebtsür…”. Anungji koba ajanga mesüra koba asoshi iba wara arua lir; koba südir süang asen Tsüngremi iba wara nungi alima anebtsütsü. Iba tamang nung lia maneni asenoki tim mapa inyaka Tsüngremer mapa jungkai atoktsü tamang yuti. Tsüngremi asenok ajak pa tawapangba tashi kübok kümzüka yujang ma. Amen

Kibubar Wadang nung
Sd/-
Rev. Dr. Mar Atsongchanger
Executive Secretary, ABAM