ABAM Asentenshi follow-up sentong Zone 6 takok ngua temogo

Dimapur, Metsüremi/March 17 (TYO): Ao Baptist Arogo Mungdang (ABAM) Asentenshi follow-up sentong Zone 6 ya March 16 aser 17, 2019 anogotem nung Saringyim Baptist Arogo nung temaotsü aser takok nung agiogo, ta Zone 6 convener Rev. Mar Pastor Lirmen Baptist Arogo aser secretary Sanen Pastor Nokpu Baptist Arogo ajanga sangdong ka nung metetdaktsü. Iba sentong ya ‘Khrista ayak asadangba’ omen nung ajemdaker ayonga liasü.
Zone 6 atema iba asentenshi follow-up sentong nung arogo 13 nungi tamaner 170 shia arua aden. Iba sentong nung tongti o jembir Rev. Kari Longchar liasü aser teyaritepertemiji C.Asangla Dimapur, K. Asangla Dimapur aser Asangla Longjemdang nungertem liasü.
Tongti O jembir ajanga, Khristan ayak asadangba mapaji pei sasa pei taküm bushiba nungi dang tenzüker, anungji asen taküm bushidangba mapang südi, ta ayongzüka liasü. Maneni paisa asen Khristan ayakji “temeim lir” aser iba temeimji Khrista temeim lir, anungji asen tamangertemi rongsen aser alima tashi meimba toktsür asen akoksaka tekübok tia kati aitsü süaka ochi nung bentet benteta liti ta akang akanga ajungshia tarur ajak asentenshiba mapang ka agia liasü, ta sangdong ajanga ashi.
Zone 6 sangeri Saringyim Baptist Arogo dang iba sentong tulu tiptema achaayangba asoshi kanga pelar ta kasa sangdong nungsa shia lir.
Tsüngremi Zone 6 sanger Khrista ayak mesamai asangsang nung kotak tongtettsü taochi sayuangma, ta Zone 6 lennirisa maneni shisem.