ABAM asoshi 2022 küm ya Sesquicentennial küm asütsü

Impur, November 19 (TYO) :  Taruba 2022 küm ya Ao limai Yisu Khrista temeim osang tajung arur küm 150 ajungba mong Ao Baptist Arogo Mungdang (ABAM)-i ayongzüka amongtsü. Aser iba Sesquicentennial omen ” Tsüngrem dang Sentsüwangshi” asütsü shimteta alinungji, kasa omenji 2022 küm ABAM omen asütsü ta tan amongba ABAM lokti senden nung lemtetogo.

Taküm 2021 küm Ao Baptist Arogo Mungdang (ABAM) 125 buba küm tatem mungdang November 18 nungi 19, 2021 tashi takok ngua agiogo. Iba lokti senden nung arogo 161 aser Fellowship 9 nungi sannükertemi anir arogo nunger ajak agi 814 arua dena liasü.

Iba mungdang sentong nung Dr. I. Lolen Imchen, ABAM tir ajanga tayongzükba agütsüba mapang, I Samuel 13:8-13 nung ajemdaker, Tsüngremer wadang takok angutsü asoshi asen tangatetba nung masü saka Tsüngremi mulungba nung inyaktsüla, anungji asenok ajaki Tsüngrem nungi shisatsü aser tangatetba meshia inyakdi ta ayongzük.

Iba kasa mungdang sentong mapang,  ABAM Executive Secretary, Rev. Dr. Mar Pongener-i Sesquicentennial jeli sangdong minute 5 video ka sayatsü aser ibaji ABAM YouTube channel nung enoktsüogo.

Iba kasa mungdang nung  2022 küm asoshi ABAM tir Rev. Sentisashi, Pastor, Kohima Ao Baptist Arogo  aser  tadong tir Rev. Temshi, Pastor, Changtongya Town Baptist Arogo asütsü shimtetogo.