ABAM CE sentong Yimten Yimsüsür, Town Committee aser Arogo Zone 5, Buba agi

Dimapur, May 12 (TYO) : ABAM Social Concern Kütdangsuba nung maneni Clean Election (CE) sentong Yimten Yimsüsür, Town Committe aser Arogo asoshi Zone 5 Buba Alichen Baptist Arogo nung May 12, 2017 anogo, Ao Baptist arogo 12 nungi nisung 146 shi arua tena sentong agia liasü. Shisalen sayur Mr. Mongküm Jamir, Managing Director, Symbios Creations Pvt. Ltd aser Rev Dr. Mar Atsongchanger, Executive Secretary, ABAM ajanga election mapang teraksa bener aruba tebilemtsü nung ajemdaker asen vote kaji Tsüngrem nungi anguba sempet tajung rongnung ka lir aser ibai alima tenzüktsü lenir shimtsü maongka ka lir; iba sempet aseni yoka kodang achir asen talizükbaer lar akümer koba ajanga asen temeten asoshi sorkar dang kecha mejembiteti terenlok kecha makai mapa ajak nung tim atemer, anungji joko item nungi asen lima kümzüka alitsü asoshi Arogoia ola atoktsü mapang ta shia liasu.
Ano tashiyim amshia tai maketertem pei temeten vote magütsütetsüsa ajuruba asoshi joko iba mapa yabo khenyongi aitsütsüla aser iba den sen amshir aser agizüker ajak temzüng nung aliba ama aruya aliba election mapangbo tasü itta memetetba mapang kechi süogo, aji ojang, saka temetetba putu nisung ama shitak tapet temerenshi agütsütsü asoshi tasu itta nokdaktsüla ta metetdaktsü.
Tongtipang kaji, asenok tang aliba tia agibo asenok kodanga nuji makümtsü aser nisung shiai ni Khristan tajung ta nubur dang mesayutet tashi clean election ji takok mangotsü kechiaser iba mapaya tangatetba agi inyakba mapa ta shisema liasu. Tayongzükba ka ji, Yisu asen menen kangki nung metaba mapang auersang aser noklang madak kibur tenati Yisu metentsüa jembiba asoshi shingaia tena memerenshi kechiaser ibaji Tsüngrem tsüngdang Ochi liasu; tanu Tsüngrem tenung nung asen ajangzüktsü asoshi mesui alima ajungtsü asoshi Ochi jembia aibelener metongshitsüti kechiaser Ochi asoshi shingaia asen maitsütsü aser memerenshitsü anungji, Khristan tajung ka ama ochishia rongsennem asen manishidaktsüi Tsüngrem metetba nisung shimti ta ayongzük.
Olemsatep mapang senso candidate ya joko malitsüla aser shirnokisa iba mapa inyaktir ozüng nung aketba ama tejak mereprangi tapet temerenshi agütsütsüsa inyaktsüla aser ano lokti tenteter talisa self help group mesukba lokti ajanga candidate dang sen meshiba anentsüla ta sensak asem. NBCC ajanga Clean Election dak sendakba mapa nung koba tetuyuba agütsüdir Tsüngrem nuken tsüboa arogotemi tasuita ochishia inyakti ta tenoktenoka jembia liasu.
Ano Election nung tokteptsü nisungtemji shiba aser tebilemba kechi aji meteta shimtsü asoshi platform tajung agütsüba dak alaka campaign tabotabo mapang balala nung yimtsüngi arua magidaktsütsüla ta sensak asem. Arogo aser Yimten maneni teka amteper asen lima Eection dak aketba temenen mapa samadaktsütsü ajungshitepa liasu. Maneni lokti ajaki iba mapa nung keja khuret ama bilema ABAM den yariteptsü nukla Tulu ayur.