ABAM Clean Election sentong Yimten yimsusur, Town Committee aser Arogo zone 6 buba agi

Mokokchung, May 16 (TYO) : Asen lima Election ajanga lentong aser takoksa bener aruba samadaktsütsü asoshi lokti balalai aruya aliba election mapangbo Tsüngrem tsübua, linük meima ochi nung election merükteta agitsü ta ABAM leniba kübok yimyim ayima odagi.
Kasa mapa dak sendakba nung Mongolbar nü May 16, 2017 anogo ABAM Social Concern-i ketdangsüa Tsüsabang Baptist Arogo tenla kidang Mokokchung Baptist Arogoi achaayanga Ao arogo 17 nungi nisung 200 shi arua sentong tajung ka agiogo. Iba sentong nung yim shia nungi yimten yimsüsür, Mokokchung Town Ward nung lenirtem, Mokokchung Town Lanur Telongjem lenirtem aser Arogo balala nungi tenzükertem aruagi shilem agia liasü. Iba Clean Election sentong ABAM-i Zone lemsar agiba nung 6 buba asütsü.
Iba sentong nung Shisalen sayur, Tir Yimyim yimozülur, Wb. K. Temjen Jamir aser Mr. Lipok Pongen Coordinator AIM, ABAM liasü.
Thomas Jefferson-i ashiba ama “asenok jakla mesük aser asenok mapa dak alang asenoki shimtetba government asütsü,” ta asüba dak ajemdaker, shisalen sayuri tanü asen governmentji asen dak alangba lir, anungji bilemdangtsüla ta metetdaktsü. “Asenoki Clean Election mapa takok angutsüba ya tasak amai bilemer, saka pei vote peisasa pei molungba candidate nem ochishia agütsütetbaji clean election lir, ibaji melamelar,” ta K.Temjen Jamirisa ashi. “ Clean election ajanga dang aseni aginüba Government tajung ka shimtsü aser aji asen dak alangba government asütsü ta nuburi angatettsüla aser kanga aroka ia shisadangtsüla ta paisa ashi.
Ano asen lima government Mozüki tajung maliba ajanga shiranger tanebtsü manguba, govt. school nung tezüngner maliba, light tesangwa tashi peria maliba, lenmang ayong ama akümba aser tzü tajemtsü agi nisung timtimba ajak ya election merükteta magitetba ajanga timtim aruba lir, kechiaser asenoki sen agi sen melentsü bilemba lenir dang shimer aser nuburia mapa meinyaki takar kümnür, iba jagi agi pei vote yoka achitsüsa akümer, iba amaji aseni asen tebok asüngtsü dang bilemra tarutsü nunga ochiji ayoktsü, ta paisa shisem.
Tongtipangsa, tanü asen lima shirangba ya asenoki tangatetba mali jangratema alitsü merangba, tamanger saka timtim maginuba aser tangatetba mali yimten nung shilem agiba ajanga lir ta paisa shisem.
Asen nüburtem mapa medeni tamang ayuba, rongsen nem puadaktsüba aser temeten o mapang nung mejembiba ya meindokra tarutsü mapang nunga anosa timtim tulu alitsü ta iba kasa sentong nung shisalensayur Wb.Lipok Pongeni ashi.
Iba senden nung kechi komala candidate shimtsü ta asüba onük nung o lemtepba mapang, aseni ochishia pei temeden vote agütsüaka, ochi mashir lenir dang shimtetra terenlok kodanga marutsü, anungji Tsüngrem tsübuba, pei lima aser nüburtem ochishia meimba nisung, sobaliba metetba, temetetba aliba, süpokrem sempaba, ochishir aser mapa akoktsü purtem shimtsüla, ta akang akanga jembia liasü.
O lemsatep mapang nungsa, joko aruya aliba election nungbo nüburtemi aginübaji election timi agitsü aser proxy vote nokdangtsü atema polling station ajak nung CCTV inoker live recording asütsü atema NBCC mesüra ABAM -i Election Commission dang ashitsüla ta tebilemba ka agütsü.
Ano vote agüjadoker lira Election Commission of India dangisa joko tezüluba nung agütsütsüla aji mesura tarutsü lanu putu nung raratepa ajak samatsü ana nung lir ta jembia liasü.
Ano election nung tokteptsü lemtetba purtem ajak nem pledge card agidaktsütsüla aser platform agüja par tebilemba ajak rakpoka shidaktsür nüburi junger ta anguba lenir shimtsüla ta sensak asemba mapang süoka jembi. Talisa, kokra clean Election asoshi inyakba telok ajak longjemer yimtsüng ajak nung yimsüsür aser lanurtem den clean election sentong agi nung ajungtsü, kechiaser item teloktemji election mapang tongtibang nisungtem lir ta shisatsü ka lemsatepogo.
Tanü iba sentong nung ABAM Women Ministry nung Secretary, Alemla Mozür aser Coordinator Wt.T.Arenla nati anir ABAM Social Concern nung lenirtem aser ABAM Youth Secretary, Toshi Sanglir nungertem dena liasü aser ABAM nung Media & Social Concern Coordinator, Wb.Lima onir liasü.
Kasa sentong ya ano May 19,2017 nü Tzürangkong nung alitsü.