ABAM Clean Election zone 3 buba sentong agi

Dimapur, April 18 (TYO): ABAM Social Concern ketdangsüba nung maneni Clean Election sentong Yimten Yimsüsür, Town Committe aser Arogo asoshi Zone 3 buba Aitlenden Baptist Arogo nung April 18, 2017 nü agiogo.
Iba sentong nung Langpangkong, Changkikong aser Japukong Ao arogo 20 nungi nisung 165 shi arua dena liasü.
Sentong nung shisalen sayurji FAC Mokokchung nung Asso. Prof. Dr. Aotemshi aser Literature and Education Secretary, ABAM, Apok Jamir na liasü, ta Executive Secretary, ABAM ajanga sangdong nung metetdaktsü.
Asen lima election ajanga teraksa adokba tebilemtsü nung ajemdaker election merükteta agia aotsü asoshi Democracy koba ajanga nisung shia nem pei temeden jembitsü, inyaktsü aser amangtsü latetja lir, iba ya asen nübori mamshiteti ozüng alema inyakra, nisung kati dang asen lima nung yimsüsütsü mesüra tamangba yimsü ka ajanga yimsüsüba arua asen tamanger jenjang anokshitsütsü ana nung lir, ta shisalen sayurtemi ashi.
Tanü asenok alima shirangba ya asen nübori Indian temzüng ozüng kübok mesüi ozüng alema aliba ajanga lir aser temzüng koba lateta lir aji nübortemi jangja memetetba ajanga tai jia shitak, shitakjia shidak ta inyakba ajanga nübor makmakshishir. Anungji nisung ajaki Indian temzüng jangja metettsü tim, ta parnokisa ashi.
Asenoki sen yong vote agütsüba, proxy vote asüba aser yimer nem vote masüba ajanga senso nungi jentokba mapa asoshi tepuokdaki aotsü Indian temzüng nung lir, anungji nisung shia itemji meteta pei temeden mapa asoshi ola adoktsü mapang tongogo.
Ano Senso Candidate shimba ya intoktsü mapang tongogo, kechiaser iba ya ajanga ochi samaa aoer aser ya khenyongi merumeru jakla jungkai adokba mapa. Anungji tanü asen mapang nungbo pei ajung asaa inyakbaya samadaktsüdi, ta tenati tesenteper ayongzüka jembi.
Shisalen sayurtemisa ashiba agi, candidate shimba tsütsü candidate jagi pei sasa, pei anishitetba aser azüoktetba taküm asütsüla, kechiaser pei sasa pei manishitetba aser mazüoktetba taküm jagi lokti asoshi takok ngua meinyaktsü. Anungji nübortemi lenir shimdang kanga kümdanga shimtsüla.
Talisa, asen tamanger ka asoshi election ya tanelar tongpang ka lir, anungji nisung shia Tsüngrem dang asüngdanga Pai molungba lennir shimtsü asoshi rongsen aser mapa yong pei kibong rangben taküm kuli mezüngmeshi mesüdaktsüi ochi lennir adokdakjang ta sarasadema lennir shimtsüla, ta shisalen sayurtemi ashi.
Sentong nung olemsatep mapang agidang, joko sen amshir agent tem mesüra shibai sen meshir, temzüng nung aketba ama putetra tepuokdaki yoktsüla aji mesüra anosa yamai aotsü südi ta tesasa o jembia liasü.
Tanü tashi sen amshir ka dak danga temerenshi agütsüba malinung yamai aoer asü ta sensaksema liasü.
Sensaksem nungsa, candidate tem nem open speech agütsüdakja ano pa/la profile tejanga lokti nem metetdaktsütsü aser memetetba lokti nem election mapang sen agüja lokti amokmerena nisung ka temeden mamshidaktsüba ya joko meshimeshia taruba election nungibo samadaktsütsü tebilembatem lemsatep.
Aruya aliba election nungbo joko sen amshir nokdanga Yimten aser Arogo tsüngda telongjem tajung nung angatetepa election merükteta agitsü jembi.
Maneni lokti ajaki iba mapa nung ABAM den yariteptsü nükla tulu ayur, ta Executive Secretary, ABAM-i sangdong nungsa metetdaktsü.