ABAM Clean Election zone 8 buba sentong agiogo

Dimapur, May 23 (TYO) : Dimapur, May 23 (TYO) : ABAM ajanga tanü asen lima election mapang temenen mapa jateta adokba nokdangtsü sentong balala agia arudar.
Kasa tongpang raratsü asoshi Yimten yimsüsür, Town Committee aser Arogo asoshi Mokokchung district nung aliba Ao Arogotem zone wise lemsar Clean Election sentong agia aruba, tatembangsa Zone 8 buba Kobulong Baptist Arogo nung May 23, 2017 nü agiogo.
Iba Zone kübok Asetkong arogotem 8 nungi nisung 70 arua sentong nung aden aser shisalen sayurtemji Wb. Bendang Yaden Asst. Registrar, Cooperative Society Wokha aser Rev I. Meren Pongener Secretary, Finance & Property, ABAM na liasü.
Sentong nung shisalen sayurtem ajanga asen lima 1980’s tashi nung terenlok aruba dak alaka joko küm aika terenlok mapa kecha meli arudar, saka asenoki ola madokteti lia arur, kechiaser asenoki election mapang sen yong asen temeden yoka chir alar kümer kazür, ta ashi.
Iba alar tia nungi nüjiba dangi arua asen lima nung asenok kibur ama alitsü asoshi election merükteta agitsüla ta shisalen sayurtemi ayongzük.
Ochi sorkar aginüra, election merükteta agitsüla aser iba dak sendakba nung Election nung tokteptsüpurtem ajak nem pa/la aser party tebilemba lemsateptsü sabang agütsüba den tesüiba mapang nung kechi inyaka liasü, item khuli tejangja meshia nübortemi kanga junga asadanger ochishia vote agütsütsütsüla tenatisa metetdaktsü.
Joko sen akar masü saka linük meima bilemba nisung Tsüngrem tsübuba, temetetba akar aser sobaliba nung tarak maket lenir shimtsüla ta tenatisa shisem.
Yimtsüng nung alirtemi joko jila nung alir dak nendaker aliba yimya intoker, pei sasa acha-ayanga alitsüla aser tashiyim mapa inyakba ajanga takok bushitepba ya asenoki asen sasa meshiba asünung, joko item mapabo tangatetertem ama mamshitsüla, ta shisalen sayurtemisa akangakanga ajungshi.
Tongtipangsa asenoki kodang aibelena lenir shimdir, mapang tatsüka lir asenok asüktemtsü. Anungji aruya aliba mapangya nüji ama asenoki tim masüba mapa meinyak khen aremzükdangti ta tenatisa züngzünga ashi.
O lemsatep mapang yimsüsürtemi lanurtem nem tashi agüja meinyaktsüla aser media balala nung aser kokra radio nung süaka, election temzüng agütsü nung ajak asoshi tajung asütsü ta sensaksem aka.
Tanü asen lima election mapang sen meshiba ya nübor makamaitba ajanga adokba asütsü akok ta asüba nung; lokti telen balala ajaki asen sasa litettsü akokba sorkar nungi lenmangtem bushia nübur nem anganütsütetra, sen mapa ya anentsü südi ta tebilemba lemsatep.
Joko kecha yimdaka party balalai camp mesemteta benjungtepba mapa meinyakdaktsütsüla aser nüngdakra candidate ajak kenüyongi arudaktsür par tebilemba shidaktsüba dak alema tanga sentong kecha makatsüla ta tezüngkangtsu o jembia liasü.
Yamaisa ora tarutsü nung asen tamangba yimsüa sama aotsü akok ta tenemjem o jembi. Tatemsa, iba sentong nung adenertemi tang taruba election mapang tanü kechi jembi itemji ochishia inyakdi ta ajungshitepa sentong tembang.
Maneni Arogo aser Yimten ajanga pei yimtsüng tensa tia apir nübor asoshi tangatetba agüja sentong tajung agitsü ABAM ajanga ajungshir, ta ABAM Executive Secretary-i sangdong ka nung metetdaktsü.
ABAM 2016 küm tatem Mungdang nung lemtetba ama Yimten yimsüsür, Town Committee aser Arogo clean election sentong Mokokchung District nung “Zone 8 tashi agia aruba nung Longchem, Yaongyimsen, Aitlenden, Nokon, Alichen, Mokokchung, Tsusabang, Chungtiayimsen aser Kobulong arogotemi host süa timtem jenti agiogo, anungji par mapa tajung asoshi ABAM ajanga pelaba lemsateper. Maneni lokti ajaki alima ajungtsü asoshi tasü itta iba tongpang raratsü ABAM tamang tulu ayur,” ta paisa shisem