ABAM : Deobar Anogo Dokan melapoktsüla

Asen tetsütebou mapang nungi amongtsümong, külemküja ajak asüngteta meshiteta among. Mapang aser tia apir tekülem anogo shimteta ashipanga aser anemponga item anogotem monga aruba tanü putu nüburtemi item sobaliba tajung aser temerüktet indang asen mulung nung mesamai lir aser jembir. Kodang Yisu Khrista Osangtajung asen lima dangi aru aser Aori anir Naga nunger ajak Khrista dak amangertem aküm, iba amongtsümong aser külem-küja ajak endok saka tangatetbabo mesamadaktsü. Joko laishibai kechi sayur aser tuyur iba tesayuba nung amangbapurtemi tashi anga tamang tasenba nung jaja. Asen Tsürabor dak nungi agizükba sobaliba tajung, koba Khrista yimsü ajanga melenshitsür tanü tashi amshir, item rongnung Temeshi amongnü ya ka lir. Yimsü tasen arur mapang talangka, amongnü meshiteta mamongertem aser sentep aonung arem aser alunung mejangertem Arogo züngsem nungi atsüngtsüba arogo tezülubatem nung angur. Par mapang pei yimsüi kechi sayu metsüngareta nübur ajaki anitak aser tashianga benshi. Iba temoatsü Arogo aser lokti den dena aser meteta aru.
Alima ajaknung ozüngnung tejangja zülua meliaka, deobar anogo yabo mapa nungi anisüngzükba anogo ta kin teimbakati züngshir. Tamanger aser mamanger ajaki pei tangatetba yari iba anogo asüngteta aser anisüngzüka amonger. Anungji hapta nung anogo ka anisüngzüktsüji meimchir rangbeni hao ta agizüktetba nisunger sobaliba ka lir. Khristar yimsü tasen arur iba temeshi among ya tali medentsü aser
tetezü tasen agütsü.
Tanü asen tensa nung iba temeshi aser anisüngzük anogo ya aiben raksatsüba angur. Item rongnung tongtipang mapa kaji Deobar anogo nung shishilempaba, dokan lapokba aser amangbapurtem shishi-i aoba. Kuli balala aika bener, pei tajangzük, pei asoshi bilema dokan lapokdaktsür aser shishir. Laishiba nung kanga jangja sayubaji “Nisungi am tesa agi malir..” ta shia angur. Tanü meimchir shisatsü, tekolok, tangatetba aser tejangraba ajakji pei “tajangzük” asoshi inyakba mapang ka lir. Iba yongji Deobar anogo meshiteta amongtsü onük nung Sorkar, Arogo aser lokti tentettemi aiben merangaka temulung süa aser Laishibai tuyuba ama temelenshika bener maruteter. Iba onükya amangbapurtem aser arogo asoshi dang masü saka Senso ajak asoshi kanga tongtipang, kechiyong tanü Naga nunger 100% tamangertem lir. Khrista asoshi ta yimyim ayimba Naga lima nung tashi Deobar anogo nung dokan lapoka shishilempara alima tsüngdang Naga Khristan tem kechi kuli agütsütsü?
Asen tetsütebou mapang nungi meshiteta aruba mapa ka aser Laishibai sayuba raksatsüba ajanga kija dangi dang masü saka kin rangben dangi Tsüngremer atakatem arur ta angatettsüla. ABAM Sanen Luden senden March 21 – 22, 2019 nung “Deobar anogo nung Dokan lapoka shishilempa asübaya khenyongi Laishibai memelaba mapa, anungji amangbapurtemi iba mapa endoktsü aser iba anogo meshiteta amongtsüla ta pangjem. Kasa senden nung Ao Arogo ajak dangi Deobar anogo meshiteta,Tsüngrem külema aser tenüngsanga amongba anogo asütsü asoshi amangbapurtem dang
tesayuba tejangja agütsütsü nungloktsüogo. Tsüngrem sentsüwangshi (Gloria Dei) asoshi jatetba mungdang ( ABAM) ka ama tesüiba putu nung Kodang Sorkari “Deobar Bazar” lapoktsü merang, nokdanga aruogo. Tanüa kasa meimchir mapa koba ajanga Tsüngremer sentsüwangshi raksatsür item
mapatem nokdanger ta sangtonger.
Sd/-                                          Sd/-
ABAM President                    ABAM Executive Secretary