ABAM-i Aor candidate-tem jaoka sarasademtsü

Impur, Tsüklai 16 (TYO): Clean election dak rangloker tang aruya aliba 13 buba Nagaland Legislative Assembly (NLA) election nung tokteptsü pur Aor candidate-tem den sarasademba sentong ka Rogonü Impur nung Ao Baptist Arogo Mungdang (ABAM)-i ayongzüka liogo.
Tanü iba sentong nung candidate S. Chuba Lkr (Angetyongpang A/C), Dr. Benjongliba Aier (Alongtaki A/C), Moatoshi (Dimapur 2 A/C), E.T Sunep (Jangpetkong A/C) aser Dr. S. Amos (Dimapur 2 A/C) parnok pungu dak alaka tanüngba candidate ajak arua iba sentong nung shilem agia denogo.
Iba sentong nung ABAM executive secretary, Rev. Dr. Mar Atsongchanger-i okilatsüdang, clean election ya shinga telok anema tenzükba masü, saka asen lima mangdang akar aser ochishir lenir adokdaktsütsü aser temelenshi ka bener arutsü nükla yur tenzükba lir, ta metetdaktsü.
Asen lima election merüka agitsü asoshi yaküm 2017 küm July 27 nungi tenzüka sarasadem inzü ghonda 7000 agia aruba den clean election dak sendakba nung sentong tapu balala ayongzüka aruogo, ta paisa ashi.
Candidate ajaki election mapang merüka shilem agiba den candidate shirnoksa adokdir, ajaki Naga nunger arok ajungtsü atema ochi shia inyaktsü asoshi paisa inyakdaktsüba olen ka shisem.
Sentong nung tarur candidate-temi mapang tatsütsü agia election nung noktakba nükjidong aser mangdang balala lemsatepa liasü. ABAM tir, Dr. Temjen-i candidate-tem atema temoatsü meshia sarasademtsü.
ABAM Clean Election Core-Committee mendenbuba, Sentisashi aser Aor Pastors’ Fellowship tir, Lipok Jamir natia o tatsütsü jembi. Iba sentong nung ABAM WM secretary Alemla Mozür menden liasü. ABAM-i candidate ajak nem Laishiba kaka agi senpettsü. Tang aruya aliba election nung ya Constituency 11 nung Aor candidate ajak agi parnok 37 lir.