ABAM-i Aor lennirtem den clean election sensaksem agi

Dimapur, July 12 (TYO): Election merükteta agitsü sentong dak sendakba nung ABAM-i ayonga, Ao Senden, Watsü Mungdang, Ao Kaketshir Mungdang aser Mokokchung Town Lanur Telongjem sensaksem ka July 11, 2017 nü Artang Baptist Arogo nung nikongdang 3:00 ako nungi agi.
Iba sentong nung lennir 32 aden aser ABAM Executive Secretary, Rev. Dr. Mar Atsongchanger-i Yohan 8:31 nungi, ‘ochiba memetetra asenok nüji maka, anungji nüji asoshi ochi dangi meyipdi ta ayongzükba den tanü asen sorkar seplasepshiba mapang ka nung lokti ajak saksalema alitsüla’ ta ajungshi.
“Asen lima tiptema alitsü asoshi asenok telok yagi mapa ka meinyakra asen lima temelenshi marutsü, kechiaser tashi akar nisungtem tanü asenok lir. Asenok tanü amenba menden nung teti mamentsü; süra tarutsü asen nübur asoshi mangdang kechi yur inyaka odar aser asen chirnur kechi tia nung anioktsütsü ta ajungshiba den asenoki asen mapang ochi inyaktsü metetsümonga meinyakra tarutsü asen lima tia ayatai asütsü” ta paisa shia liasü.
Clean Election sentong ya nisung ka mesüra telok ka anema masü aser nisung ka tajangzük asoshi-a masü, saka tanü ochimashi mapa ajanga asen lima alar tia nung aliba nungi arung tarutsü mapang nungbo asenok jangratema lidi ta asüba mapa ka lir; anungji senso tajung ajaki ochishia Mungdang aser lokti balalai koba sentongsa agidar ajaki yangji shilem tajung agia aruya aliba election nungbo sen yong asen temeshi vote meyoki asen jenjang yangludi ta Executive Secretary-isa tenok tenoka tesentepertem ayongzük.
Tebilemba lemsatepa sensaksem agiba mapang lokti ajaki tanü asen lima kanga raksaogo aser nübur ajak asüktemer; anungji alima yanglutsü asoshi iba mapa ya kanga tongtipang aser ajaki pei tatah shilem nung takok ngua inyaktsü asoshi telok kanem dang iba mapa menungloktsüi lokti ajaki kati ka den yaritepa inyaktsü nüngdak ta jembi.
Talisa, asenoki pei ajung dang bilemba shisatsü meintoktetra alima anosa tamajungba tia kati aitsü ana nung lir, anungji nübur ajaki pei yimer asoshi dang mesüra pei kibong agitsü dang bilemba shisatsü intoker nübur asoshi bilema inyakra asen lima temelenshi adoka election merüka agitettsü aser asen lima nung terenlok mapa kechisa angutsü tim ajak timi angutsü ta tesentepertemi jembi.
Election merükteta magitetba tashidak rongnung kaji tiyazü electoral roll ayuba lir; saka tia makai asen nüburtemi constituency ajema küma lir ta iba tai memetongshiteti tiyazü seret amshia arutar. Tanü tamanger tajungtemi ochishia alitsü mulungteta electoral roll shitak amshitetra election merükteta agiba mapa nung shilem tulu ka asütsü, anungji iba ya mapa küma inyaka aotsü lokti ajaki temulung agüja inyaktsu ajungshitep.
Lennir tajung shimtsüji nübur dak tashi lir, anungji asenok nüburtemi candidate tem shiba aji jangja meteta shimtsü kanga tongtipang ta sensak asem.
Tatem nung ABAM ajanga telentem nung lenirtem ajak asoshi Tsüngrem nungi temoatsü aser teyari meshia bendanga agütsüba sarasadem agia iba sensaksem senden tembang. ABAM ajanga Artang Baptist Arogo dang iba sensaksem senden asoshi achaayangba atema pelaba metetdaktsür aser maneni ABAM ajanga Clean Election sentong balala agiba nung kija aser lokti ajaki shilem tajung agia asen lima merüktettsü tamang ayur, ta ABAM sangdong ka nung metetdaktsü.