ABAM-i ayonga 26 Aonglenden A/C bye-election candidate-tem den sarasadem sentong ka agi

Mokokchung, Rongchii/April 04 (TYO): Ao Baptist Arogo Mungdang (ABAM) Social Concern Committee-i ayongzüka 26 Aonglenden Assembly Constituency bye-election nung tokteper candidate-tem den sarasadem sentong ka ABAM conference hall, Impur nung kaogo.
Iba sentong nung ABAM Social Concern Committee mendenbuba, Dr. Aotemshi-i candidate-tem dang inyakdaktsünüba o kar ashidang, nübur meima tenzüktsü, pei bilemba nung masü saka Tsüngremi mulungba nung aniba aser Laishibaji teteyur tajungtiba südaktsür inyakba lennir kaka asütsü tayongzükba agütsü.
Sentong nung Indian National Congress (INC) candidate, Alem Jongshi aser Nationalist Democratic Progressive Party (NDPP) candidate, Sharingain Longkumer natia mapang tatsütsü agia parnok election-i aiba nükjidong balala lemsatepa liasü.
ABAM Executive Secretary, Rev. Dr. Mar Atsongchangeri candidate-tem atema Tsüngrem dang temoatsü meshia sarasademtsüba den külemi tena nem temeshi Laishiba kaka amoktsü.