ABAM-i CEC Bikers rally ayongzüka agir

Kohima, August 4 (TYO): Nagaland nung Clean Election Campaign (CEC) maparen tali ayimsünga odaktsütsü atema arogotemi tanü nungi bikers rally ka ayongzüka agir.
February 2018 nung Nagaland state general election agitsü lir aser iba asoshi Nagaland Baptist Church Council (NBCC)-i anir Khristan teloktemi Nagaland nung election dak sendakba maparen merüktettsü atema sentong balala ayonga agiyonga arur.
Tanü tenzükba bikers rally ji Ao Baptist Arogo Mungdang (ABAM)-i ayongzükba lir aser Impur nungi tenzükja liasü.
Rally nung shilem agirtemi Mokokchung jila, VK Town, Wokha, Tseminyu adener taonung Kohima jila tonga aru. Taonung yangi anisüngzüba sülen parnok asüng meyipa aotsü aser Ungma yimtsüng nung iba rally tembangtsü.
Tanü bike rally nung shilem agirtemi yimtsüng aser jilatem nung anenzüka senzüdang “Your Vote You Voice, Your Vote Your Future” osang sangdonga liasü.
Parnokisa NBCC pamphlets lema agütsü aser vote agütsürtem dang temeten ochishia amshitsü aser vote ka dang enoktsütsü osang sangoktsü.
Parnokisa vote agütsürtem dang pei indang vote mayoktsü aser voter identity card ka dang amshitsü tayongzükba agütsü.
NBCC-i adokba pamphlets nunga vote agütsürtem dang election nung tashiyim aser sen mamshitsü temepishiba zülua lir.
Candidate temi votes malizüktsü aser nisungtemi votes mayoktsü ta mulunga nangzükra, Clean Election ji mapa tasak ka masü, ta tanü Kohima nung NBCC Clean Election Campaign Core Committee (CEC-CC) Convener aser ABAM Executive Secretary, Rev Dr Mar Atsongchanger-i ashi.
Clean Election Campaign ya yimten telok kar pusema mesüra anema inyakba mapa ka masü, saka election maparen merüktettsü atema lir. Election merüka agiba ajanga lennir tajungtem shimtsü aser parnoki Nagaland nung terenlok bener aruba den asenok tejakleni aotsü, ta paisa ashi.
“Asenok ajak longjemer clean election ya asangsang nung ataloktsü atema mapa inyaktsüla, aser iba jagi sorkar aser lennir tajung adoka ketdangsübaren tajungba akümtsü” ta paisa shisem.
Arogo 1566 nung tzüsena aliba nisung lakh 7 dak temai election mapang Khristan tangatetba nung nokdaktsü ta telemtetba agira, Clean Election ji akoktsü, ta Rev Mar Atsongchanger-isa metetdaktsü.
Sentong nung NBCC CEC- CC Member, Colo Mero-ia o jembidang, “Naga loktiliba nung temelenshi adoktsütsü atema CEC tenzük. Nagaland nung yimten teloktemi politics ya tenüng atema dang lir aser sorkar akümba sülen terenlok mapa meinyaker. Election mapang nisung aikati sen aazüktsü lenmang ang bushir aser pei jurila ajangzüktsü atema dang tajangzükba bushir” ta ashi.
“Naga nungertemi clean election asangsang nung ataloktsü atema temulung taroktiba nungi melenshitsüla. Asenoki sen yong vote aika agütsüba inyakyim toktsüdi aser Naga loktiliba nung temelenshi bener arutettsüpur lennir/candidate shimdi,” ta Mero-isa ayongzük.
Clean election maparen nung lanuputui kanga meranga shilem agitsüla aser takok ngudaktsütsüla kechiyong ibaji asünungdang asen tarutsü jenjang tajungba akümtsü, ta paisa shisem.
Nagaland nung nübortemi Society aser Arogoi ashiba sülen anidak nungdang clean election ya takok ngua inyaktettsü, ta Mero-isa ashi.
Kohima kübok Old MLA Hostel junction nung agiba sentong nung mendenji NBCC Co-Convener CEC-CC Rev Vikuo Rhi liasü, Phezoucha Baptist Church pastor Keduoneituo Yhome-i temoatsü meshia sarasadem aser KBA Associate Pastor Youth Tiatoshi Longkumer-i tenüngsang agüja tembang.