ABAM-i Clean Election bikers rally nung yariteper ajak dang pelar

Impur (Mokokchung), August 17 (TYO): ABAM aser NBCC clean election campaign tenüng nung ABAM Youth Ministry-i August 4-5, 2017 anogotem nung ABAM-i ayongba “NBCC clean election bikers rally” nung shilem agirtem, sarasadem aser lenmang balala agi yariteper ajak dang pelar, ta Youth Secretary ABAMYM, Impur, Toshi Sanglir-i sangdong ka ajanga metetdaktsü.
“Nenoki yaritepba aser nungitba ajanga clean election biker rally kanga takok nguogo, aser iba atema ABAM Youth Ministry-i nenok ajak dang pelar. Nenok mapa tajung atema ajak takoksang asen Tsüngremi nenok ajak moatsütsü ta onoki sarasademtsür,” ta kasa sangdong ajanga metetdaktsü.
Aika rongnungi nija, lokti aser Arogo kar dang alakteta pelaba lemsateper:
1. Mokokchung Deputy Commissioner, Sunil Kumar IAS-i mapang agütsüteta biker rally tenzüktsüba atema pa dang pelar.
2. SBAK youth Secretary Hekato Awomi aser VK town Sumi Baptist Church Pastor den VK nüburtem dang pelar.
3. Executive secretary Lotha Baptist churches council, Rev. Nyanchumo Lotha leniba nung Lotha Baptist Churches Council-i pelaa agizüka chiyungdaktsüba aser bikers 28-i Kohima tashi aser Wokha-i meyipa aruba nung shilem agiba atema pelar.
4. Pastor Tzumenyu town Baptist Church, Youth Secretary Peter Kent, town council aser Tzumenyu town nüburtem dang pelar.
5. KABA-i JMC nung Bikers ajak agizükba aser NBCC-i chiyungdaktsüba atema pelar.
6. Angami Baptist churches youth secretary aser Pastor Botsa town Baptist Church-i anir Botsa nung aliba nüburtem dang pelar, aser chiyungdaktsüba atema-a pelar.
7. Wokha town Ao Baptist Church-i August 5, 2017 nü chiyungdaktsüba atema pelar.
8. Pastor-i anir Alichen 2nd NAP Police Baptist Arogopurtem dang pelar.
9. Sentong tatembangbuba aser chiyungdaktsüba atema Pastor Rev.Dr. Noklen leniba nung Ungma Baptist Arogo aser ABAM Tir dang pelar.
10. Clean election bikers rally atema T-Shirts tenlaba atema Synergy store Dimapur, Rakesh Store Mokokchung aser Power center Mokokchung dang pelar.
11. Signature campaign banner tenlaba atema Longpok press Mokokchung dang pelar.
12. Iba campaign tenzükba anogo nung Mr. & Mrs. Olem Longchar, Mangkolemba-i biker’s orientation mapang chiyungdaktsüba atema par kibong dang pelar.
Iba campaign nung yariteper kija aser tentet ajak dang pelar, Tsüngremi nenok ajak moajang, ta kasa sangdong ajangasa metetdaktsü.