ABAM-i CM nem sen lakh 36 agütsü

Impur (Mokokchung), Aami/June 27 (TYO): Mokokchung, June 27 (TYO): Ao Baptist Arogo Mungdang (ABAM)-i shidi ka ajanga Nagaland Chief Minister dang, sorkari kanga tongtibang project- Kilma, Peren nungi Tizit tashi Foothill Road yanglutsü sentong agizükba atema pelar; atangji iba lenmang ya Naga nunger aser kidanger state-tem atema tongtibang lenmang ka asütsü ta metetdaktsü.
“ABAM-i iba atema bilemtsüba aser pelaba temaitsü sen 36,56,282/- (sen lakh semertrok, meyirijang tenemser trok ser noklang ana ser tir ana) iba project atema tenla agütsür,” ta ABAM Executive Secretary, Rev.Dr. Mar Atsongchanger-i metetdaktsü.
“Iba lenmang yangluba nung onoki nungita yaritsü, iba denji külemi iba lenmang ya mapang shidak nung renemtsü atema onoki nü dang iba mapa ya nai ketdangsüa inyakdaktsüner. Iba lenmang ya tarutsü putu aika atema senmang ka asütsü ta onoki imlar,” ta ABAM tenüng nung paisa mepishia metetdaktsü.
Tanü ABAM lenirtemi Kohima nung Chief Minister ajurua iba sen ya agüja liasü. Foothill Road atema tanü CM nem agütsüba sen ya yaküm ABAM kübok aliba Arogo ajak nung saruba sen lir.