ABAM-i Deobar anogo meshiteta yunür

Dimapur, November 29 (TYO): Taoba küm ishika arogotem aser arogo tentettemi Nagaland nung Deobar nü ya tekülem anogo ka ama amonger ta shiyonga arur. Anungji, tekülem anogo nung tanga sentong kecha ayonga magitsüla, ta Ao Baptist Arogo Mungdang (ABAM)-i Nagaland Governor R.N Ravi dang shidi ka nung ashi.
Deobarnü ya Nagaland nung Khristantem atema tekülem anogo ka ir anungji tekülem raksatsüsa sentong kecha ayonga magitsüla. 2019 Hornbill Festival ya Deobarnü (Dec 1) tenzüktsü aser iba ajanga Khristantem tekülem raksatsütsü, ta ABAM-i Governor dang ashi.
Ano, 2019 Hornbill Festival nungsa December 8 anogojia Deobar lir aser iba jagi tekülemertemi tetsükdaktsü ajurutsü. Shitakba agibo Hornbill Festival ya sobaliba takar sayutsüba mapang ka lir saka benjung monga arudang, tamagitsü nung sen endokba benkung ka ang kümdaktsüogo, ta ABAM-isa ashi.
“Item tebilemtsü onüktem nung ajemdaker Ao Baptist Arogo Mungdang (ABAM)-i 2019 Hornbill Festival lapokba sentong thinentsü aser iba benjungmong nung ajuruba Deobar anogo medendaktsütsü atema mepishir” ta Executive Secretary, ABAM Rev. Dr. Mar Atsongchanger aser Tir ABAM Rev. Temsu S nati shidi nung shia lir.