ABAM-i Impur quarantine nem chiyungtsü renemtsütsü

Mokokchung, May 21 (TYO): Impur nung aliba Clark Memorial Higher Secondary School quarantine centre amshitsü Ao Baptist Arogo Mungdang (ABAM)-i melaogo, ta osang ajanga metetdaktsü.
Impur quarantine centre nungji nisung noklang ana (200) shi mungtettsü aser iba centre nung anemponga amunger ajak nem ABAM-i angati chiyungdaktsütsü khuret benzükogo, ta osang ajanga angazüker.
ABAM-i quarantine centre maparen atema lakh 17 buget yanglua lir, aser iba atemaji arogotemi yaritsü asoshi ‘ABAM Covid19 Relief Fund’ ka tentetogo, ta osang ajangasa ashi.
Impuri arur ajaki pei kidangi arur ama bilemdaktsünür, tanendak aser chiyungtsü renemtsüba den külemi ibai ABAM-i meimchir dang temeim mapa den anepalu sayutsü asoshi maoangka agia inyaker, ta osang nungsa metetdaktsü.