ABAM-i LKM nem tenüngsang agütsür

Dimapur, September 23 (TYO): Langpangkong Kaketshir Mungdang (LKM) ajanga Clean Election Campaign Committee tenteter Sept. 3, 2016 anogo nung tzükong nübur ajak asoshi sentong tajung ka ayongzüka akaba aser Election merüka agitsüba dak sentakba nung bangzüng terasem (13) tashi renemba osang kakettem nung sangdongogo. Iba ama pei nübur aser linük meimba maparen tajung ngua ABAM-i pelaba sangdonger, ta ABAM Executive Secretary, Rev. Dr. Mar Atsongchanger-i sangdong ka nung metetdaktsü.
ABAM Social Concern Committee senden ka Sept. 22, 2016 nung mena LKM-i koba bangzüng takang yangluogo iba nung ABAM-ia nungittsü aser yariteptsü lemtet, ta paisa sangdong nung shia lir.
“Election merüka magitetba ya Tsüngrem tsüngdang temenen tulu lir. Iba tongpang tulu ABAM-i aser lokti tentet balala-i rara-a aruba mapang ka nung LKM ajanga koba inyaker, ya nübur ajak asoshi anisüngzük aser teimla ulura mera tapet aser tongtipang ka agitetogo ta pelaba Ao kin ajak dangi sangdonger. Amangba purtem ajak longjemer linük aser nübur terenlok asoshi Election merüka agitsü tayongzükba tulu nung shilem agitsü ayimoktsür” ta Rev. Dr. Mar Atsongchanger-isa metetdaktsü.