ABAM-i nokdanger ta asüba pusemer

~ B. Meren, Land Mark Colony, Dimapur.

Anogo 30 Sept. 2015 ABAM-i nokdanger ta sür tejen yimsüyimpong kar dangi meyipa maotsü, iba ya khristan ka inyakyim mesüra Laishiba tesayuba masü ta sangdongogo. Iba sangdong nung tongtipang ojang ka “AZÜNGASHI” ta agütsüba ojang nung ajemdaker Aor tashi-tawar aikati pei tangatet lemsatepa züngshia temoatsü agia arudar. Zünga arudang iba ojang ya kanga dongtipang ta angateta nia tangatetba kar lemsaner.
Azüngashi ta asüba ojang ya asen Aor oshi nung kangadang tongtipang ojang ka lir aser iba ojang yagi inyakyim palala aika ajenpanga lir. Inyakyim kar kanga dang taret kar pongpapar aser kar sobaliba nung kar tamangba nung amshi. Iba ojang yagi inyakyim aika ajenpanga ali nung koba inyakyim tanü amshitsüla aser kobasa joko mamshitsü aser ABAM-i koba mamshidaktsüner itemji tamanger kati peisasa angateter alitsü yimlar saka iba onük sendakba nung tangatetba palala aika Olemsapang nung ya lemsatepba ngua nia kü tangatetba kar lemsatepner. Olemsabang nung zülur kari Azüngashiba inyakyim aika benoka lemsatepogo, item ajakji lepshia mashir saka inyakyim ka indang-tang ni lemsatepner.
Azüngashi mapa ya asen Aor yimtsüng shia tera balala amshia alitsü akok saka tsürabur nungi angazüka aruba agi Azüngashiba ya mapa aika nung reta amshir saka kangadang ret-reta tetsübutsüka amshia arubaji, Ali chiteba mesüra Tzü jemtepba ya liasü. Iba Azüngashiba ya nisung ana tsüngda, kidong ana tsüngda, yim ana tsüngda etc. o atsütepdang alima nung aliba ozüng obendang kecha nunga temulung melemi kümer joko peisasa pei ochi puküma iba oset, iba lushi, iba tzü ya kü indang masünungbo ni südakjang ta Lijaba Tsüngrem, Tekong Tsüngrem, Kimong Tsüngrem, Tzü Tsüngrem (Tzü Tsüngrem dang ya Aor karibo Alachela ta-a ajar) etc. par mapang nung amangba Tsüngrem dang Azüngashia chiteba, jembiteba mapa ka lir. Tanü asen Aor yimkong nung Alima pur putu süitema Arogo putu nung lia arur asünung, tanga azüngashiba inyakyimji toktsür tejen mapang asen tsüraburi par tamangba nung ajemdaker par Tsüngrem dang koma azüngashia aru, iba kürak amshibaji asen tamangba (khrista yimsü) nung mapet ta ABAM-i nokdangbaji pa teinyaktsü tim inyaker ta kü tangatetba lemsateper.