ABAM -i Nokte Mission bendanga agütsüogo

Impur, July 09(TYO) : Arunachal Pradesh nung 1993 küm nungi Ao Baptist Arogo Mungdang (ABAM)-i Nokte lima nung Yisu Khrista temeim osang tajung sangdonga,samaa aliba tanülatem anir arutsü asoshi,’Mission Feild” mesemteta inyaka arur külen tan taoba ita June 30 nü parnok Nokte arogotem nem bendanga agütsüogo.
Taoba küm 26 tashi ABAM-i Arunachal nung mamangba purtem den Yisu temeim osang tajung lemsatepa arur külen tang parnok Nokte Baptist Asathem Roapkhoan (NBAR) nem bendanga agütsüba anogo tashi nung Nokte lima nung yimtsüng arogo 54 tenzüker liasü. Itema arogotem nung aliba tamanger kibong ajak agi 1704 nungi tamanger züngsem 6488 liasü.
Ibaji dang masü saka ano Poakkoam nung Class A nungi 10 tashi High School ka lapokja lir. Item dakji alaka ano ABAM ajanga parnok nisungtem rongnung Tsüngrem tenzüktsü asoshi laishir 71 tashi züngtetdaktsüogo ta ABAM Church & Mission sangdong ka ajanga metetdaktsüogo.
Taoba June 30 nü ABAM Nokte Mission Feild parnok nem bendanga agütsüba sentep sentong nung ABAM Mission Board nungi mendenbuba Rev.Wati Kichui anir parnok nisung 14 tashi oagi shilem agia liasü.
ABAM-i mesemtetba Nokte Field ya parnok nem bendanga agütsüaka, ano ABAM-isa senotsü agibo 2020 tashi yaritsü tenangzükba lir.
Taoba küm 26 tashi Nokte Mission Feild takok ngua inyaktsüsa tonga oagi tenzükertem aser teyariteper arogo aser kibong ajak dang kanga pelar ta ABAM lenirtemi metetdaktsüogo.