ABAM-i Senso Candidate shimba aitsür aser nokdanger

Dimapur, July 13 (TYO): 1964 nungi tenzüka Nagaland nung Election agia arudang, limapur tiai tanaben yiogo. Konang asoshi tekolak alepba tia tanü asenoki ajurua odar. Akhi mapang yim kati yim ka anema apuso, saka, tanü asenoki yimer tsüngda tekolak alepba tia ka ajangshia odar. Tanü election ajanga bener arutsüba tebilemtsütemji reprangdangra temolung shirangtsü ka lir, ta ABAM Executive Secretary-i sangdong ka nung metetdaktsü.
Sübokrem onsara, Tiyazü seret talubo aser tashiyim ulura ajak ya yimjung tsükchirtem lir. Tanü Khrista dak amangertem yimjung lu ayimertem asen Naga nunger asen tamang kong ali? Rongsen koba tashikang tener orija ama anüngleni yima oa atoker (A. Shin 23:5) iba rongsen nem puadaktsü aser temaba nung ajungkettsü tashi koba Tsüngrem ket nung dang lir (T. Ken 75:6) iba tashi asenoki amshia nisung ka ajungkettsü meranger. Sura, tanü asen mapa Tsüngremi temeshi ta züngshidar ma?
Item tebilemtü khuret nungi kümzüka alitsü nükla nung ABAM ajanga Aoer yimtsüng aser Town nung yimsüsür, Town Committee aser Arogo den Clean Election sentong zone ti (8) lemsaer agiba mapang, nübur ola adokba aser rongdak taginüba kaji, “Senso candidate shimba ajanga senso tajung ka temeden rakzükraktema alar tia nung toktsüba mapa joko asen lima nungi samadaktsüner”.
Tanü yimya tamajung kaji, telongjem tenung nungbo tai jia shidak aser shidakjia shidak asenoki koba agitsü? Au, telongjem nung inyaka alitsüji tim aser tajung, saka yimer telongjem tenüng nung kati ka amokmerena senso ka nem temeden magütsüi alar tia nung amshia Senso Candidate shimba telongjem yabo khenyongi majung.
Anungji, ABAM ajanga nübur taginüba angateta, asen tamanger kuli tajung mezüngmeshi masütsü asoshi aser nübur ajaki mulungba nung lenir tajung shimtsu asoshi aruya aliba election mapang asen Aoertemi tashiyim amshitsüsa telongjem tenüng nung Senso candidate mayutsü ayongzüker. Shirisa tashiyim amshia senso candidate shimdir ABAM ajanga iba mapa asoshi aitsür ta Aoer tamanger tajungtem dang iba ola sangokja yimjung ola yoker.