ABAM-i Temesepba Chiyungtsü mamshitsü ajungshiba anogo amung

Dimapur, May 31 (TYO): “…Tsungremi meimchir tindang yanglu saka parnoki aika puratetogo” Sayutsungir 7:29 nung ashiba ama, tanü asen lima nung pei sasa bendenba tashitak agi kangshiba pur jenti kümogo, ta ABAM Executive Secretary-i tanü sangdong ka nung metetdaktsü.
Asen lima temesepba chiyungtsü ajanga timtem agütsüba aser tasübatem reprangdangra, tarutsü putu nung tanurtem aika alar ama tsürapur mali temeimtsüka asütsü. Item tebilemtsü khuret asoshi lokti balalai süoki ia sentong tapu aika agia odar.
Tanu alima ajunga nung temesepba chiyungtsü ajanga alima tarutsü tia tamajungbai aiba angateta WHO ajanga “World No Tobacco Day” ayonga mungoko. Kasa tebilemtsü khuret bena ABAM ajanga temesepba chiyungtsü mamshitsü ajungshiba anogo tanü May 31 anogo among.
Ao Baptist Arogotem ajak nung, Mokokchung District administrative office ajak (Sorkar aser NGO) aser shishilembaba tesem ajak dangi Administration aser ABAM office ajanga tanü temesepba chiyungtsü mamshitsü osang agütsüogo
Arogotem aika nung anepdang sarasadem agiba den tekümdangtsü o zülur shishilembaba tesemtem nung yutsüogo aser jila kar nungbo tashi angatepa temesepba chiyungtsü shishilemba mesüi anogo süidaktsü.
Kasa sentong Mokokchung area Ao Baptist Arogotem aser lokti telen balala ABAM ajanga ayonga Imlong Place Mokokchung Town 7:00 – 8:00 ako tekümdangtsu aser meteta alitsü sentong agi.
ABAM ajanga Temesepba chiyungtsü asoshi Lai O nung kechi ashir item Lai tekongtem kar den temang nung kechi takoksa bener arutsür, itemji zülur tarurtem ajak nem agüja liasü.
Arogotemi placard nung temesepba chiyungtsü ajanga kija kibong aser lokti nung timtem agütsüba ojangtem zülur sentepa sentong nung shilem agi.
Sentong nung Wb. R. Ayim Lkr President, All Ward Union, Mokokchung Town aser Wt. Alemla Mozur Secretary, ABAM WM ajanga tayongzükba O jembia liasü.
Tayongzükba O jembirtemi tanü asen lima teraksa aser timtem adokba aser rongsenkettsüng takoksa jenti ajuruba dang masü saka lanur tajung aika tebenjem mapang taküm tembangogo. Ano aika kasa tia ajurutsü ana nung lir ta lokti ajaki bendanga agüja iba tongpang nung shilem agitsü ayongzüka liasü.
Talisa, ABAM-i 2011 küm Ao lima nungi Yi küm ter tsüngda nung meshimeshia samatsütsü nükjidong yur iba Tongpang rara-a sentong balala agia arudar.
Arogo kar nungbo detoxification camp agia aruba ajanga achiajemer jenti melenshia tang karbo arogo nung tenzükba mapa inyakdar; anungji arogotem ajaki arogo nung training mesüra seminar sentong balala agiba den chia ajemer asoshi khen süoki ia rongsen intok mesasai tarutsü mapangbo detoxification camp amala sentong agira ABAM-i nükjidong ayuba ama asen lima nungi achi ajemer samatsü ta tayongzukba o tulu agüja liasü.
Tatem nung Mr. Chubatemjen Coordinator, Sunday School ABAM ajanga temesepba chiyungtsü nungi asen lokti kümzüka alitsü asoshi lokti sarasadem ayonga temoatsü ngua agi.
ABAM-i iba tongpang nung kija, kibong aser lokti ajaki ochi nung raratsü tamang sarasadem ayur, ta Executive Secretary-isa sangdong nung metetdaktsü.