ABAM Literature & Education Ministry “Re- Envisioning” Sentong agi

Dimapur, Metsüremi/March 04 (TYO): ABAM Literature and Education Ministry “Re-Envisioning” (Deeper, Closer and Stronger) sentong T. Ken 51:10 nung ajemdaker March 1 – 3, 2019 anogo nung kanga takok ngua agiogo. Iba sentong nung Arogo 105 nungi Asso. Pastor Child-i anir Child teasyurtem 321 arua aden. Iba sentong ya tarutsu mapang tanü asen chirtem jenjang tajungba nung alitsü asoshi tanü tesayurtemi koda mangdang tulu ayutsü tim ta asüba nükjidong nung agi.
Iba sentong nung shisalen sayur ya Mr. Godfrey Fernandez Director of Arete Elements Bangalore, India liasü.
Rev. Dr. Mar Atsongchanger Executive Secretary, ABAM ajanga pela agizuka tayongzükba agütsüba mapang, asenoki mangdang aser nükjitong tulu ayutsü akok, saka asenok Tsüngrem tsüngdang bendanga agütsüba taküm kaka mesüra item ajakji amajok dang asütsü ta shia liasü. Maneni paisa, tanü asen ABAM kübok tanurtem 36000 shi lir aser item tanurtem tanelar lenmang nenok ket nung lir, anungji parnok tarutsü jenjang bilemdanga bendanga agüja tenzüktsüji nenok mangdang asütsüla, ta A. Shin 22:6 nung ajemdaker ayongzük. Shisalen sayur Godfrey ajanga “Re-Envisioning” onük nung ajemdaker session 9 tashi agia liasü. Omen nung ajemdaker jembiba mapang, tesayur ka asoshi tarokba, anasaba aser tashi taitba nung Tsüngrem den tanurtem asoshi mangdang tulu ayutsü tongtipang tesayuba agütsüba kar yamai liasu. “Tesayur kati tanü 500% mapang agütsütetba taküm asütsüla, kechiaser tanü tanurtem asen dang nungi ponguben tali techiraba aser tekeraba lir, tesayur kaji temeim angatetba tesayur ka asütsüla, tanurtem mangdang angateta tapet tesayuba agütsüba taküm, tanurtem asoshi anasatiba Tsüngremji tesayur, anungji Tsüngremi mulungba yimya aser libaliru shitak amshia sayutetba taküm; kechiaser tanurtemi aseni sayuba dang nungibo asen yimya timba angazüker, na koma yamaji dang nai sayuba tanurtem asütsü, anungji nai tanur ka koma kümdaktsüner yamaji litetba taküm, Tanelar chiyungtsü agütsüba dang masü saka alima nung alir asünung yimya yimpong aser awashi tejangja agütsütetba taküm asütsüla” ta sayua liasü.
Aser item mangdangtem shitak amshitetsü asoshi tesayur shia anogoshi pei taküm reprangshiba taküm asütsüla aser Tsüngrem den sensaksemtsü asoshi Pa nem mapang peria agütsütetba taküm asütsüla, ta kanga nendaka sayu.
Iba sentong nung T. Apok Jamir ajanga tatempang tayongzükba mapang, Ministry-i aginüa sentong yangluba ama tesayuba tejangja agütsübaya Tsüngremer sentong lir, anungji asen tenzükba angadi masütsüar maneni ano tali tamang akangshir mangdang tulu nung tanurtem jenjang tajung yanglütsüdi, ta I Kor 15:57&58 nung ajemdaker ayongzüka sentong tembang.
Tsüngremi maneni ABAM nung aliba arogotem Child tesayurtem mangdang tulu yur sayuba ajanga tanurtem Tsüngrem dangi anasatibai anir arutsü tamang sarasadem ayur, ta Executive Secretary, ABAM ajanga sangdong ka nung lemsatep.