~ T. Tsükjem Jamir.
Yisui ashi, “Kodang tanüla Temeshi nenok dangi arudir, nenoki ain agizüktsü aser yirusalem nung yihuda aser samaria ajak nung aser alima tatem tonga nenoki kü kulitem asutsü”. T.M 1:8.Idaki yisu Khristai amangba purtem nem pa Mission nungloktsüba tesem pezü (4) angur, Yirusalem Mission, Yihuda Mission, Samaria Mission aser alima tatem tonga pa kuli asütsü. Iba ozüng agütsüba asenoki laishiba nung angur. ABAM aser local arogotemi taoba pututem nung aser tanü tashi koda inyaka aru (ABAM church History) tatsü agi lemsateper.
YIRUSALEM MISSION (Ao Arogotem Koda Tenzüka aru) 1872 – 1926
ABAM Hon Jubilee tashi America Missionarytemi Impur lima mesemtet. Parnoki Ao kin asoshi school lapokja, aser Ao lima nung Khristar osang tajung asoshi timtem jenti agia tetsüng agi jaja inyaka aru. Parnok tamang aser meranga inyakba ajanga 1921 tashi nungbo Ao Arogo 51, Lotha Arogo 9 aser Sema Arogo 10 tashi kumer liasü. Joko ABAM Hon Jubilee küm pungo (5) ranglok 1926 küm matongdangsa Aor limapurtem ajak akok tashi Khristan kümdaktsütsü ta mongdang committee pangzüng renem (N. Mongchen page 100). Aji oda ABAM-i sarasadema renemba ama ABAM Hon Jubilee 1926 kum Impur nung sentepdang limapur aika Khristan kümer liasü.
YIHUDA MISSION (1926 – 1950) (Ao Arogotem nung ABAM i inyakba)
ABAM Hon Jubilee 1926 küm sülenbo Ao Arogotem tashi itta akümtsü asoshi Reformation committee ka shimteta arogo ajak tejakleni aotsü asoshi Mungdangi yamai lemtet. Iba mapang tashi ABAM nung sayutsüngir Rev. Subongwati dang liasü. Iba putu nung ABAM arogo ka nung dannga LICENCE akaba Pastor meli-i liasü. Anungji arogotem tashi aittsü mechi Missionary Rev. Wickstradi tasa sentong ajanga ABAM nung aliba Pastortem ajak mapang shia Impur nung Pastoral Training tajung agütsütsü aser parnok nem Pastoral Licence agütsütsü ta lemtet. Iba sentong ajanga Ao Arogotem ajak tali tejakleni ao (N. Mungchen page 126). Aji dang masü ano ABAM Platinum Jubilee 1947 kum Impur nung alidang lanurtem Tsüngrem o angazüka arogo nung tenzüktsü asoshi Impur Bible school lapoktsü renem. Kodang Naga nüchiso atema India nunger den rara adok, India sorkar azüng ajanga Foreign Missionary ajak Naga lima toktsütsü ozüng agütsü. Anungji Missionary R.F. DELANO 8th Feb. 1955 aonung ABAM field ajak Rev. L.Kijungluba nem agütsü. Iba aonung Missionary-bai Rev. Kijung dang ashi, “ America Missionarytem Ao lima nung küm 80 dak tali inyaka aruogo, anungji onoki matongba anüdoklen kintem nenoki sentoka tedoktsü.” (N.Mungchen page 126-132).
SAMARIA MISSION (1955-2000) ABAM i pi kin asoshi inyakba
America Missionary ashibaji Tsüngremer ola ka ama ABAM i agizüka Impur aser Jorhat nung Bible school nung Training tajung agirtem aser ano secular Education nung class VI (six) tashi azüngertem Tanüla nung tejangrartem aika Ao lima arogo nung dang masü saka anüdoklen kintem nung ABAM i ketdang süa kin terok (6) tangi osang tajung bener ao.
1. Sangtem kin dangi —————- 96
2. Chang kin dangi —————- 142
3. Phom kin dangi —————- 147
4. Konyak kin dangi —————- 153
5. Yimchungru kin dangi —————- 119
6. Khiamnungan kin dangi —————- 51
(Ao arogotem nung tatalokba otsü By Rev. C.Walu. page 68-116)
Ano Ao arogo centenary 1972 küm amongba mapang ABAM tenzüker den Tsüngremi jembia centenary sülen Arunachal Pradesh state nung Tsüngremer osang tajung sangdongtsü renem. Anungji mezüngbuba Aor tamang tir Rev. I.Longsa-i anir Missionary 25tashi agi pei taküm bendanga agüja taoba küm lir (40) tashi tenzüka arugo. Ibai ABAM i SAMARIA Mission tanabuba takok anguba liasü. Küm aika Ao lima nungi Tsüngrem nisung jenti adoka tangar kin asoshi pei ama meima senti takum jenti lalua inyaka arugo. Tsüngremer wadang tashi anga inyakba ajanga tanü asen Aortem iba jenjang tashi Pai moatsüogo.
(2000 – 2016) ABAM INTERNATIONAL MINISTRY. Tanü ABAM i Ao arogotem . Ajungshia China Mission wadang asoshi aiür asangur degree balala akartem ishikabo Nagaland nungi yoka par University nung zünger külen Company balala nung mapa inyaka osang tajung sangdongtsü merangdagi. Iba sentong ajanga Tsüngremer nükjidong atalokdaktsütsü asenok tamang sarasadem aser teimla tulu lir. Iba sentong takok asoshi arogotemi sarasadem den tamang tenla ABAM nem agütsütsüla. YIRUSALEM MISSION TANÜ AROGOTEM ASÜNGSASHITSÜ NUNGDAKA KUMOGO. ABAM i (1872-2016) kum 144 tsüngda nung akok tashi pi bendanger kintem asoshi Tanülar wadang kechi tashi inyakogo ajaki mulungsüa bilemer. Tanü putu nung tongtibangsa lanurtem alima shisatsü (Education) aser rongsen ren (Economics) tsütsülen kanga tejakleni ogo. Saka tanü Aor tamangertem alima (Cultural Renaissance) aser alima putipuyang palala ajanga (Ethical standard) tamang jenjang kanga teküpbok tia nung lua lir. Tanü asüng Young Intellectual teloki bilemer sentepi maoyongja kidang God T.V nung tajungba sayutsüngir ta ashir, Hau ajia shidak saka Pa dak amangba purtem tenla kidang longjema pa külembaji Tsüngremer tenangzükba ozüng lir. Laishibai ashir ” tenüngsang agi asenoki pa tekülemdaki odi arung”. T.K 95:2 nung shia lir. Anungji tanü ABAM i anir arogo purtemi lanur temetetertem atema Tanüla sentong tapu palala achaayangtsüla. Tanü Ao arogotem nung BODBAR , HONIBAR sentepi arur kanga ajema kumogo. Iba asoshi arogo nung toklang tenzükertemi (Full time worker) kanga kuret süa pa wadang nung meranga inyaktsü nüngdaka kümogo.
Tanüla Anepalutsü lenmang (Spiritual Remedy Measure). Tanü putu tensa nung Tanüla saktsü mezüngbuba sabi (key) ji tsüraburi kibong nung pei chirnurtem Tsüngrem O züngzünga sayubentsütsüla. Aser ano arogo purtemi pei arogo nung Home Mission nung ano tali temulung agütsütsüla. Yisui Lk 15:8-10 nung ashir tetsür ka la akaba taribi sen ter nungi ka par kidang lai memeteti sama, lai aji meteta milen tsükloker kilongji ajak oka maneni mangu tashi bushijen bushi tesülen sen kaji ngua pei kiyonger ajak den pelatep. Aji oda kibong aser arogo nung samaba Tanüla sentong balala ajanga inyaktsüla. Aji oda arogo purtemi yamaji inyakra Tsüngremi pa nübur den mapa inyaktsü. Laishibai ashir ” Tsüngrem anasai arung, aser pai nenok anasai arutsü” Yakub 4:8. Tanü 21st centuary nung England aser America nung taoba 18th , 19th centuary nung tenla ki topur tajung yanglubatem tanübo par semchirtemi tekülemi maruba ajanga küm aika shibanga yur, joko tanübo club balala dang auction süa yokadokogo. Tanübo item tenla kiji shi azü jangraba asayaba club ki ka dang akümba alima otsütem nung ashir. Item tatalokba otsütem ajanga tanü Aor arogotemi kanga sarasadema aroka ashisadanga tanü lanurtem Tanüla nung tejakleni anitsü atema putu den apet sentong palala achaayangtsü kanga nüngdaka kümogo. Amen.
You must be logged in to post a comment Login