ABAM & MTABCM-i Mini Hornbill Festival atema DC dangi shidi ka zülu

Dimapur, Chiteni (July) 27 (TYO): State sorkari Luroi (August) 1 nungi 3 tashi Mokokchung nung Mini Hornbill Festival ayonga amungtsü dak sendakba nung ABAM aser Mokokchung Town Ao Baptist churches at Mokokchung (MTABCM)-i Mokokchung Deputy Commissioner dangi shidi ka nung temepishiba onük kar züluogo.
Nagaland sorkari benjung ayongzükbaji onoki maitsür kechiyong benjung nung Naga nunger lanurtemi parnok indang sempet sayutsü maongka angutsü aser Naga nunger sobaliba tajung tangar dang sayutettsü. Saka, iba benjung ajanga Mokokchung mesüra temeket nung jabujari masütsü, amajok nung senotsü melalutsü aser ozüng alema mapa meinyaktsü atema reprangshimtsü mepishir, ta ABAM Executive Secretary, Rev. Dr. Mar Atsongchanger aser MTABCM Chairman, Puryapang nati shidi nung shia lir.
Benjung amungba tesemtem nung aser nü ketdangsüba telongtet nung yi aser temesepba chiyungtsü kecha mamshidaktsütsüla aser benjung mapang jila nung fire-crackers ama tapoktsütem kecha mepokdaktsütsü atema mapa inyaktsü mepishir, ta tenati DC dang mepishi.
Benjung ayongertem dang aonung tesü mesüra ayaterm tashi sentong magitsü tetuyuba agüjang ta mepishir. Aonung 9:00 ako tashi nungbo benjung nung adenertem ajak kidangi meyipa arutsüsa sentongtem yanglu nungbo kanga pelatsü, ta Dr. Mar aser Puryapang nati shidi nungsa shia lir.
Sorkari nüngdak maliba nung senotsü meindoktsü atema onok metetdaktsür aser nenjung amungdang gambling mesüra betting games melidaktsütsü atema tetuyuba agütsütsü mepishir ta tenatisa shisem.
Tetsür aser tourist tem dak tim mesüi kongshiba mesüra teka sangshiba den yimdong nung rarabangsen adokba noktangtsü atema town sector committee tem den amalitepa mapa inyaktsü aser benjung amungba mapang jila ajunga nung police temi temi anüktsü atema mapa inyaktsü ayongzüker, ta tenatisa Mokokchung DC dang ashi.