ABAM Nagaland Canaan Farmers School Training agi

June 9, 2017 : ABAM Nagaland Canaan farmers school training Chungtiayimsen Baptist Arogo nung arogo 6 nungi nisung 15 arua training agi.
Alima nung joko tangar dak nendaker alir aika mali saka asen lima reprangdangra Tsüngremi asen nüngdakba dak alia ali temo aketba moatsü, saka tanü aseni item temoatsü mamshi tangar dak nendaker lia arur. Talisa tensa tia mejungra taküm sottsü ang süngla ratamatatsüsa asenok lir. Yamai dang ora asenoki tangar kübok alitsü ana nung lir aser yamaji kodang südir asen tamang jenjang dena mashileni aotsü tensa arutsü. Item tebilemtsü nungi kümzüktsü lenmang nüngdak ta ajiteta ABAM ajanga iba Canaan Farmers School training ya 2016 küm nungi agüja arudar, ta ABAM sangdong ka nung metetdaktsü.
Nagaland Canaan Farmers School training ya nisung ka taküm rangben temelenshi adoktsü nükjidong nung agia arur. Iba Canaan Farmers School ya ajanga nisung ka takar akümtsü sayuba mapa ka masü saka, nisung kati koda tangatetba nung pei taküm sottsübo inyakteta tangar dak menendaki litettsü aser tanela nunga Tsüngrem tsübuba nung temelenshi adoka asen lima kümzüka ayutsü ta sayuba sentong ka lir.
Iba school ya tebilemba shisa (ideology) inyaktsü, tenzüktsü aser bendanga agütsütsü aser nükjidong (motto) shia metettsü asoshi inyaktsü, bendanga agüja nendaka inyaktsü aser ajemalua tenzüktsü ta nung ajemdaker tenzüka inyaker, ta ABAM-i sangdong nung shia lir.
Iba sentong nung shisalen sayurtemji- Rev. Dr. Mar Atsongchanger Executive Secretary, ABAM, Dr. Sashiyangba District Project Officer, Land Resource Development Govt. of Nagaland aser Mr. Panger PA to Executive Secretary, ABAM nungertem liasü.
Shisalen sayur ajanga Nagaland Canaan Farmers School langpang yimya (table manner) nungi nisung ka achiajemba dak sentakba nung nisung “kati achitsü asoshi dangbo machitsüla, mapa meinyakli süra techiyong aser chi su ka asoshi ghonda 4 bosa inyaktsüla” ta sayu.
Achiba yimya nung tokshitokra meli teyari achitsüla kechiaser item taji tajemtsü manguba nisungtem aika lir, nai tokshibaji kar nem agütsüba tajungba mesüra na tarutsü mapang asoshi rizüngtsüla ta nisung kati teinyaktsü meteta alitsü mezüng sayua liasü.
Nisung ka anema alinung dang mapa inyakteter aser inyak nung dang achitsü angur yamaji anema alitsü asoshi anepdang temang shi azü salabangla (exercise) tapu balala agia liasü, ta parnokisa ashi.
Aluyimba nung tejang tajung atangtsü asoshi mangdang tulu alitsüla, metsü tajung asütsüla aser mapang peria intoktsüla. Kasaji asen tanela nunga tejang tajung atangtsü asoshi mangdang tulu alitsüla, aseni tajung inyaktsüla aser Tsüngrem nem mapang peria agütsütsüla ta aluyimba aser tanelar mapa asadangtepa sayua liasü. Anungji asen lima temelenshi adoktsü asoshi nisung shia ni mezüng melenshiti aser inyaka sayuti ta asütsüla ta shisalen sayurtemisa sayu.
Iba dak alaka ali tajung/mol koda yanglutsü aser tsünüsenpong koda asütsü mapa agi sayua liasü. Yangi tongtipang kaji koba sungjang kechi li nung ajunger aji metettsu tim ta ajangajanga sayu. Aseni alu tulu meyimtetaka asen Ki temekut nung danga aseni anogoshi achiba aonsotsü koba tanü asenoki bazaar balala nung alir, itemji danga aseni azümesen mesüi inyaktetra aji agia asen rongsen tuluka kümzüktsü ta sayua liasü.
Tesayuba nung ajemdaker telok balala lemsar, aluyimtsü asoshi sentong yangludaktsü aser yamaji telok ajaki aluyimtsü sentong tajung bener arua kanga tajangzük ngugo.
Tatem nung training nung adener ajak nem certificate tajung agüja liasü. Maneni ABAM ajanga iba sentongtem agia aodang asen nübur azümesen nungi tekümküm yimyai melenshia Tsüngremi agütsüb li tajung anepalua amshia asen sasa litetba taküm kaka küma Tsüngrem tsübuba nungi mepilai alitsü Pa dak tamang ayur, ta ABAM Executive Secretary-i sangdong nung metetdaktsü.