ABAM office ki tasen mesemtetogo

ABAM Executive Secretary, Rev. Dr. Mar Atsongchanger-i November 27 nü ABAM administrative building mesemtettsür külen building committee züngsem den ABAM ketdangpur aser lennirtem den külemi tangokba noksa nung angur. Impur, (Mokokchung) November 27, 2015

Impur, Nov 27 (TYO): Hokolbar nü yangi Impur mission centre nung Ao Baptist Arogo Mungdang (ABAM) executive secretary, Rev. Dr. Mar Atsongchanger-i ABAM administrative building ki tasen ‘Nokinketer Mungchen’ meraketa mesemtettsüogo aser iba ki ABAM Tir, Rev. Temjen Longchar ajanga meshiteta sarasadem.
ABAM executive secretary Rev. Dr. Mar Atsongchanger-i Laishiba tekong ka zünga “tanü anogo ya ABAM otsü nung otsüsütsü ka asütsü” ta shia pai iba kiji mesemtettsü.
Iba ki tasenba ya sen crore 2.28 indoka asü. Yangi ki tamentep (storey) pongu lir. Yangji executive secretary office nungi tenzüka department balala indang office amenoka lir. Iba den kaketnang (library) lir, nisung 90 mentettsüsa takdang ka lir, VIP meeting room, parking, kitchen, seating room, metsümeshidak aser ano tanga takdangtem lir.
Iba administrative ki asütsü asoshi 2008 küm Nov. 28 nü Ungma nunger taoba NCS (Rtd) tsürabur Wb. N. Talitemjen Jamir-i lungzüng azünga yutsü aser taoba ABAM Finance Property Secretary, Rev. A Temjen-i temoatsü meshia sarasademer iba mapatong tenzükba küm tenetbuba nung yangluzükogo.
Missionary mapang nungi tenzüka yashi tashi Ao Baptist Arogo Mungdangi tenüng teta office ta ajatsüsa ki kata meyanglu. Mungdang tenzükertemi timtem kanga aremogo, saka tanü putu den apet office ki akatsü tim ta ser kimung mesemteta ABAM office asütsü lung azüng aser ibaji meshiteter tenzükba tanübo asangsang yanglutetogo, anungji iba asoshi Tsüngrem nem tenüngsang agütsür, ta building committee mendenbuba, Rev. C Walu Walling-i metetdaktsü.
‘Mungdang tenzüker joko küm 150 anasa aruba mapang ka Ao Baptist Arogotemi iba ki yanglutsü lemtetbaji kanga menur amato karibo bilema alitsü, saka Ao kini pei dang nungi pi atema dang bilema mission mapa inyak. Oda khen ashitsü agi Ao kinji missionary kin ta ajatsü temsüa inyakogo’ ta paisa ashi.
“Tanü asenoki ki ka yangertetogo, ibai asenok ajak telungjem, teyaritep ajanga lir. Anungji, iba office ya maneni ‘Tanela Nokinketer Mungchen’ tiyongtsü ser inyakdi” ta paisa tayongzükba ka agütsü.
Rev. Waluisa iba ki asüba maparen nung teyariteper aser tetenlar ajak dang pelaba metetdaktsü.
Tang yangluba kidang takdangtemji temulunger kija aser telok balalai tenla agüja renemtsüba lir, takdang shia nung tetenlar tenüngtem madaka angutsü. Tanü iba office mesemba den külemi ano office kima süngdong kar tema yutsüogo.