ABAM Sunday School Adult Christian Education sentong agi

Dimapur, Metsüremi/March 01 (TYO): ABAM Sunday School Adult Christian Education sentong February 27 aser 28, 2021 anogotem Impur nung kanga takok ngua agiogo.

Iba sentong nung Associate Pastor Christian Education, Associate Pastor Youth aser Sunday School superintendent ajak meyokteter parnok 75 shi arua dena liasü.

Iba sentongya tanü asen Ao arogotem nung teintet rook asoshi Tsüngrem O anganütsü rongdak nungdak ta angateta, Deobar Skol nung akhi ama adult class ya asentenshia agitsü nükla nung agia liasü, ta Rev. Dr. Mar Atsongchanger, Executive Secretary, ABAM ajanga sangdong ka nung ashi.

Tanü arogotem ishika dak alaka iba adult class makai teintet rogo asoshi mejeteta Tsüngrem o anganüba sabang mali. Anungji, parnok asoshi arogotemi Tsüngrem o angatsü maongka lapokja adult class agitsü tongtipang ta iba sentong nung tesayuba tajung agüja tangzükba tulu angu.

Nükla tulu nung iba sentong tajung agia aodang Tsüngremer leniba ajak den liang ta ABAM

tamang ayur, ta sangdong ajanga ashi.

Iba sentong nung tongti shilem agir ya T. Apok Jamir Secretary, Literature & Education Ministry, ABAM, Dr. Moalila Lecturer, CTC aser Mr. Chubatemjen Ozukum, Coordinator, Sunday School

ABAM nungertem liasü.