ABAM Youth Ministry-i E-God (Encounter God) sentong ayongzüka agi

Dimapur, April 5 (TYO): April 3-5, 2017 tashi ABAM Youth Ministry-i E-God (Encounter God) ta ser sentong ka ayongzüka kanga temoatsü nung agiogo
Iba sentong nung Youth Director temi anir lanurtem arogo 90 nungi ajak agi 337 arua aden.
April 3 aonung Rev. Dr. Mar Atsongchanger Executive Secretary, ABAM-i o jembidang, “Tsüngrem shidakba ajurutsü asoshi teinyaktsü mapa ana lir; aser itemji Pai ajaba anga temenen mapatem toktsütsüla aser tongtipang kaji Pai mulungba inyaktsüla aji asü nungdang Tsüngrem ajurubaji ataloker” ta lanurtem ayongzük.
Iba sentong nung shisalen sayur Mr. Imnatoshi Longkumer Asso. Pastor DABA aser Mr. Moatemjen Jamir Nehemiah, Dimapur na liasü, ta ABAM Youth Ministry sangdong ka nung metetdaktsü.
Dimapur area Youth Director tem ajanga tanü Khristan lenir ka lokti nung koda takok tulu nung terenlok bener arua inyaktsü aser Tsüngrem tsübuba lokti adokdaktsütsü ta asüba nung ajemdaker lokti ka tenzüka aoba nung yimya agi tia pezü ajurua aoer aser kodang itemji meinyakteter loktij tamakok angur, ta shisalen sayuri o jembidang ashi.
Mezungbuba nung lokti ka kodang tenzüker nisung shia tebilemba balala nung yimya balala bener arur asünung obang mapui kechi nung atemtsü aser kechi inyaktsü memeteti lokti kümteta aoer koba dang yanglua kümtetba Tia ta ajar. Iba sülen ajaki tebilembatem bendena rajemshiba mapang alir koba dang metongshitepa reprangshiba Tia ta ajar. Iba Tia nung tebilemba ajak doktena yanglushiba mapang agir aser ya kanga tongtipang lir. Tasembuba nung nisung shia pei mokokmein angateta ni dang shidak ta asüba mesüi ni lokti den koda Tim sütettsu ta tangatetba arur aser iba dangji Tim sütet Tia ta ajar, ya ajak dang tasakba lir. Tatemsa kodang ajakji kokteta arur idangjiang ajaki kasa shilem agia arok ta sür inyaktsü tenzüka takok angur aser ibaji inyakba tia ta ajar, ta paisa ashi.
Tanü asen lokti aika nung meputep adokba ya item tiatem nung takok manguba ajanga südi, anungji tanü Khristan lenir tajung kati ajak ya inyaktsüla ta shisalen sayurisa tesayuba agütsü.
Aonung shia Lai o tapet sayuba den anüngdang asaya tapu balala agi lennir ka koda tazüokba nung pei akoksa aka lokti tejakleni aotsü asoshibo bendanga inyaktsü tesayuba tajung aika agüja liasü.
Anngdang sentong tatem nung kodak aser molumi atangji lir ta temaitsü jilushi agi tembang.
Lanurtem aikati Tsüngrem den lira teti asoshi tepela lir ta kuli agüja temoatsü ngua liasü.
ABAM YM-i iba E-God sentong nung adenertem ajaki pei arogo nung tatah shilem nung takok ngua inyakba ajanga lanurtem aika Tsüngrem temeim dangi anir arutsü tamang ayur, ta ABAM Youth Ministry sangdong nungsa metetdaktsüogo.