ABAM Youth Ministry Self Reliance Skill Training agi

Mkg, Aenjeti/Jan. 31, 2020 (TYO) : January 29 – 31, 2020 anogotem nung ABAM YM ajanga lanurtem asoshi pei sasa ahyanga tangar dak menendaki taküm lia aotsü nükla nung Self Reliance Skill Training agia liasü.
Tanü asen lima nung tazünger onsara küma adokba den sorkar dak dang metaloker aliba ajanga alima sensak tia-i anogoshi aiba asenoki angur. Akhi mapang asen Otsüla aser Oboula nunger mapa inyakba agi melaki mapa nung kanga temerang liasü, saka tia makai tanü asenoki iba sobaliba tajung samadakja odar; tia makara küm ishika sülenbo alar tia den kasa tangar kübok ahyangtsü mapang arutsü südi. Anungji item tia nungi asenok talisa lanurtem jenboa asen yari inyaka meraketa lia aotsü nükla nung iba training ya küm asem agia aruba yangi tempanger. Dang tashi nung lanurtem aika tangazükba jenti ngua karbo mapa küma inyaka odar aser iba asoshi Tsüngrem tenüng asanger. Anungji, arogotemi maneni lanurtem asoshi yamala training tajung pei arogo sasep nung agütsüra lanurtem aika pei sasa ahyanga alitsü lenmang sayur asütsü.
Iba sentong nung tesayurtem Mr. Arenlong Longchar Naharbari Dimapur (Longhkhum), Mr. Toshi Sanglir Secretary, ABAM YM aser Mr. S. Meren Manager Book Room, ABAM liasü.
Parnok ajanga Medicated handmade Soap, coffee scrub, liquid soap, tiger balm, mosquito repellent spray aser recycled paper book making tesayuba tajung agüja lanurten tangazükba aika ngugo. Ajak agi arogo 22 nungi Associate Pastor Youth temi anir lanurtem 67 arua dena liasü. Associate Pastor Youth adenertemi ashiba agi tanü tensa den kanga petpeta Mr. Toshi Sanglir Secretary, ABAM YM aser Mr. Tekatemjen Coordinator ABAM YM lenisüba nung iba sentong tajung agiba ajanga lanurtem aika tangatetba tajung nguogo, yamala lanurtem den apet sentongtem maneni arogotem nung agia aotsü junger, ta shia liasü.
Tsüngremi asen lanurtemi tangatetba nung mapa küma inyaka aodang asen lima nung temelenshi tulu adoka pei sasa nokdakteta alitsü jenjang tongtetdakjang ta ABAM-i tamang sarasadem ayur, ta ABAM Executive Secretary, Rev. Dr. Mar Atsongchanger-i ABAM sangdong ka ajanga metetdaktsü.