ABAMYD Triennial Conference tembangogo

Mokokchung, October 05 (TYO): Ao Baptist Arogo Mungdang Youth Department (ABAMYD) 4 buba Triennial Conference October 4, 2015 nü tembangogo.
Mungdang nung NBCC General Secretary, Rev. Dr. Kethozelhou Keyho-i lanurtem dang telempet Khristan ka ama ama malitsü saka chichiba Khristan kaka asütsü ayongzük, ta 4 buba ABAMYD Triennial conference, Media Cell-i sangdong ka nung metetdaktsü.
Mokokchung district kübok Impur, Centennial Memorial Hall nung iba mungdang tasemnübuba nü tekülem sentep nung Tsüngrem O jembidang Dr. Keyho-i, Nagaland Baptist Churches Council (NBCC) kübok Arogo 1536 nungi lanurtem nem temeim aser yimjung osangtajung proktsü atema sabang dang agütsüra item lanurtemi sayatenya inyaktettsü, ta ashi.
Paisa ashiba agi, Nagaland nung Khristan tamangba yimsü tenzükba ya odang atalokba ka masü saka Naga nunger melenshia tekolak bushiba nungi tanela bushirtem kümdaktsütsü atema Tsüngremer sentong liasü.
Nagaland nung Khristan yimsü küm 143 buba amanga aruba dak sentakba nung NBCC General Secretary-i, ‘Khristan maliba lokti ka nung tamangba yimsü tasen ajanga asen tetsü-tebou nungertemi timtem tensa ka ajangshiogo, ajisüaka tanübo item ajakji khenyongi melenshiogo aser Khristan shilem 99 aliba state ji Nagaland kija lir,” ta ashi.
New Delhi, October 5 (Agencies): Delhi anülulentip tsütsü Munirka tesem nung Deobar nü yangji alir telok kati Manipur nungi arishi küm 28 asangur ka dak kotari agi atsüng aser iba tatalokba ya tenükmerem ajanga asütsü südi ta temulung melemi bilemer.
Tang tashi nung nguteta aliba osang ajanga ashiba agi, asangusangji Manipur nunger Zack Paojagin ta jangjaogo aser pa dak kotari agi matsüng tsüngda mezüng par kiyonger telok kati o tamajung shia arrja liasü. Iba sülen rara adoka parnoki Paojagin dak kanga mejungi züker kotari agi atsüng.
Iba tatalokba dak sentakba nung item tamajung inyakertem anema Delhi police-i Vasant Vihar police station nung FIR benokogo ajisüaka parnoki ibaji khen yua atar kechiba süra osang tejangjabo bushisüngdangba sülen ang metettsü.
Paojagin ya tang tashi süchia aoba nungi shia maru lir aser Safdarjung hospital nung surgery agiogo.
Delhi Police North East Representatives(DPNER) kati, parnok mozü kidangi oa yirur alisang den ajurutepa jembiba sülen ang osang tejangja metettsü, ta ashi.