ABBA indang music tasenba taküm küm tom sülen sayatsü

Aenjeti/January 21 (Agencies): Abba business partner Gorel Hanser-i ashiba agi, taküm küm tom sülen ang band indang music tasenba sayatsü.
Nüngtugu ken ‘Dancing Queen’ atener telok ABBA-i 1981 küm ‘The Visitors’ sayaba sülen nungi tang tashi nung studio LP ka danga yanglua mali saka Bjorn Ulvaeus aser band nung züngsem asem – Agnetha Faltskog, BENNY ANDERSSON aser Frida Lyngstad nungeri trac tasen ana record süa lir.
Track kaji taruba BBC documentary atema ‘I Still Have Faith In You’ aser tanga track kaji ‘Don’t Shut Me Down’ asütsü.
Ajisüaka, Sweden nunger popstar den otongdar, Gorel Hanser-i ashiba agi, taküm küm band yagi record masü saka track ana sayatsü ternemba lir aser iba track ya taküm küm meyi mongpu sülen ang sayatsü.
Gorel-i ABBA telok indang album tasen ka sayatsü atema osang agüja maliyongjia, temalen Bjorn-i par telok ajanga album tasen ka adoktsü atema osang metetdakja liasü.
Taoba küm Mongputeni/October 2018 ita Bjorn-i, “Album tasen ka mesüra track pezü sayatsü akok, ta shia liasü.
Taoba küm sayaba film ‘Mamma Mia! Here We Go Again’ nung ABBA indang soundtrack amshiba ajanga par telok indang music tanaben nüngtugu kümogo.