Abe-i Castro den North Korea’er nuclear onük benoka jembi

Cuba yimtiba, Havana nung tenetba Revolution Palace kimalen agiba mitkartemi tetushi agütsüba sentong nung Cuba Tir, Raul Castro (Tiyongtsü) aser Japan Ato Kilonser, Shinzo Abe (Achijilen) nati shilem agiba noksa nung angur. (Havana, September 23)

Havana, September 23 (Agencies): Japan Ato Kilonser, Shinzo Abe-i yashi, Brehostibar nü Cuba linük semdanga, taoba Cuba lenisang, Fidel Castro den senden amenba osang ka Japan foreign ministry otongdar, Yasuhisa Kawamura-i tanü, Hokolbar nü metetdaktsüogo.
Abe-i tan Cuba semdangba sülen pa Cuba semdanger mezüngbuba Japan Ato Kilonser akümer lir.
Abe-i Havana yimtiba tonga aoba sülen alima ajungai ka küma lungjemer North Korea’er nuclear mapatong anentsütsü atema inyaktsü onük Castro den benoka liasü.
China dak alaka, Cuba ya North Korea pusemba aser par linük den tesendaktep junga ayuba linük lir.
Ano, United States aser Soviet Union nati aniba telok anaprong nung madenertemi 1961 küm tenetba Non-Aligned Movement nung China aser North Korea den aroki Cuba linüka züngsema lir.
United Nations (UN) telemtetba aser alima ashi mangai, Pyongyang-i par tongpang nung amshitsü nuclear osettsüset aser missile-tem taküm kanga sashia tendangtsü tenzükba ajanga kidangsüa aliba South Korea o Japan linük na den külemi, alima nem tebilemtsü khuret bener aruja lir.
“Pyongyang-i tenzükba nuclear mapatong anentsütsü atema alimai ka küma lungjemer nungdakba maparen inyaktsüla,” ta Abe-i Castro den minute 70 shi agia senden amendang lemsatepa liasü.
“Pyongyang’er nulear mapatong den sentakba ken o ji yimjung sentong ayongba ajanga bentettsü nungdaker,” ta taoba mapang, 2003 küm Japan kübok Hiroshima semdangsang, Castro-ia metetdaktsü.
Cuba linüki küm 50 shi tesendaktep mejungi arur külen US den tanaben sentaktepshitsü tenzükba sülen Abe-i tan Cuba semdanger lir.
Abe-i Castro den ajurutepba sülen tenu, Cuba Tir, Raul Castro dena yashi nikongtsütsü ajurua, par linük ana tsüngda tesendaktep junga ayutsü jangraba olen lemsatepba osang angazükogo.
Japan-i Cuba nungi tzüyim nungi anguba chiyongtsü, moko aser coffee alizükba aser Cuba dang kol osettsüset ayokba densema, par linük ana tsüngda taoba mapang nungi shishilembatepa aruba osang bushiteta lir.