Abe-i Pearl Harbour atema tatok memeshitsü

Tokyo, December 06 (Agencies): Japan Ato Kilonser, Shinzo Abe-i Japan nunger lenir mezüngbuba süa tan December ita 26 aser 27 nü US kübok Pearl Harbour semdangtsü. Abe-i Hawaii nung item anogotem nung US Tir Barack Obama den ajurua sensaksem akatsü lir.
Abe-i tan Pearl Harbour semdangdang pai tesüiba mapang, 1941 küm December 7 nung Japan nunger sepaitemi US nunger meyong rong anendak tesem amakdang tepseter nem akhüm agütsütsü saka iba amakba atema taidokbo memeshitsü.
Japan Ato Kionser-i Pearl Harbour semdangba ya US Tir, Barack Obama-i taküm May ita Hiroshima semdangba sülen semdangtsüba sentong renemer lir.
US Tir-i Hiroshima semdangba mapang yangji aliba nüburtem nuclear bomb agi yirutsüba aser iba ajanga nüburtem tim atemba onük jembia liasu saka pai iba bomb pokloktsüba asoshi tatokbo memeshi liasü.
“Nisung tepsetba atema taidok meshitsü atema masü saka tongpang raradang asürtem bilemtettsü atema tan semdangtsü sentongji renema lir,” ta Japan Chief Cabinet Secretary, Yoshihide Suga ajanga Tokyo nung osangbener den jembidang shia liasü.
“Iba tesem semdangba ajanga tarutsü putu dang iba kasa timtem toushi tanaben matalokdaktsütsü azüngashiba aser Japan o United States na tsüngda tesendaktep tajung aliba sayutsü” ta paisa shisem.
Abe-i Pearl Harbour semdangba ya US Tir asütsü atema shima alisang, Donald Trump den tesendaktep tan asena yanglutsü atema terenemshiba agir alitsü.
Japan aser US na tsungda tesendaktep indang tasüngdangba kar Trump-i benokba ajanga Abe alimar lenir rongnung Trump den tsüngdong ajuruteper mezüngbuba lenir küma liasü.