Abel Math sempet agütsütsü atema Sir Andrew Wiles shimer

Copenhagen, March 15 (Agencies): Mathematics shilem nung Abel Prize agütsütsü atema Britain nunger ongko mongin, Sir Andrew J. Wiles shimba osang ka Norway nung tenteta Academy of Science & Letters (ASL) teloki tanü, Mongolbar nü metetdaktsüogo.
“Kümshi agütsüba Abel Prize indang math shilem sempet agütsütsü atema Britain nunger Wiles shimogo. Wiles-i aso aika mebushiteti aliba Fermat’er Last Theorem shitak ta kuli bushiteta number zülujang den sentakba lenmangtem sadema lapoktsüba nüngtem nung pa nem Abel Prize agütsütsü renemogo,” ta ASL teloki osang jangjashitsü.
Fremat-i tesüiba mapang, 1937 küm poratetba theorem ochi lir ta arishi küm 62 tain Wiles-i 1994 küm kuli tejangja bushitetba osang jangjaogo.
Norway kübok Oslo yimti nung taküm May ita 24 nü sentong tajung ka agia, Oxford, Cambridge, Columbia aser Yale densema, Britain aser US na nung tentetba university aika nungi honorary degree angüsang, Wiles nem senpet sen dollar sen 710, 000 densemba sempetji agütsütsü renema lir.