Abelen mesüra achichilen : Yohan 3:16-20

“Aser kodang nenoki tajichilen mesüra tabelen meyipdir, nenok tenarongi nenok tesülen ola ka shia angashitsü. Lenmang ibai lir, iba nung jajaang!” (Isa. 30:21).
Talira ola jagi teret majang kümdaktsür, teret majangba agi balaka razüka aor aser telok balaka tentetter. Seret shitak mayuba ajanga Khristantem telemsa adoker aser rajang akümer. Lairen ochibai den balala. Ibai ozü ka tashikang kati dangbo yima moutetba ama lir! Asenoki Temeshi Laishiba nungji nendaka lira aser Tanela Temeshi nem bendanga agütsüra, Yohan 3:16-20 nung nangzüka aliba ajakji asenoki akhangtsü akok. Tanü asenoki ochi ana odangdi.
1. Tsüngrem Temeim aser Tsüngrem Ain Adokba
Kati ashir, “Kar timtem tatem maka molumi yoktsü Tsüngremji kanga temeim.” Kati langzür, “Kasa mapang nung temenen pur ka kotaki yoktsü Tsüngremji kanga temeim!” Teraksa aser temenen nungi temulung meyipba ka dang Tsüngrem temeimji ashitsüla tekong temerang ka dang Tsüngrem ain adokba indang ashitsüla. Tenyar Pauli Tsüngrem jakla jakrep ana ya kanga junga odanga sayu. “Anungji Tsüngrem kümli ajung aser tesashi ajiang: telaortem tsütsü tesashiba, saka nai Tsüngrem kümli tajung nung maneni lira, ne tsütsü Pa kümli tajung.” (1 Kor. 11:22). Kodang Tsüngrem kümli ajungba aser majungba indang mejembilir Tsüngrem tsübuba malitsü. Kangki nung Tsüngrem temeim aser Pa ain adokba pilatsü makok. Minister kati Tsüngrem temeim indang dang jembira tailaba temulung meyiper adoktsü aser kati Tsüngrem ain adokba indang dang jembira jashiba Khristantem adoktsü. Charles Spurgeon, shiba dang sayutsüngir chuba (The Prince of Preachers) ta ajar pai ibai shidak sayur: “O bendangba noklang nok jagi asenok joko metsübudaktsütsü; saka tsürabur ajok asenok den odang lir.”
2. Tang aser Tarutsü
Khrista tanaben arutsü nangzükba tangsa ataloktsür ta kari sayur. Kari Khrista Tanaben arubaji tarutsü nung sentsüwangshia alitsü ta yimlar. Mezüng teloki tanabuba telok dang tarutsü bilemertem (futurist) ta ajar. Tasen Lai nung tenangzükbatemji tang aser tarutsü, anaprongla atema lir. Tatishitsü agi temeshiba. Asenoki tanü merüktetta alitsü saka Kibuba aruba nungang tabensa akümtsü. Tang ta aliba takümji anogo shia meshitetta ata nungdang Pa tanaben arudangji tabensa kümdaktsütsü (1 Yn. 3: 2, 3; 1 Tesa. 5:23). Taneptsüba nung kasa tasüngdangba. Kalvary kangki nung inyakba tajangzükji tanü iba temang nung asenoki ka agitsü akok. Saka tajangzük ajungaji temang ajunga alangzükbaji asütsü koba asoshi tang asenoki atar (Rom 8:23). Tashidak aser tasüba ajunga tang asenoki atsütoktsü makok. Tatembangba akoktsüba tsükchirji tasüba lir (1 Kor. 15:26). Ano tanga onük kaji, Tsüngrem yimli. Tsüngrem yimliji tang asenok rongnung lir, saka shidakba yimliji tarutsü nung lir (Lk. 17:21; Rom 14:17; Mt. 6:10; 2 Tim 2:12).
Ne yimli arung, Kotak nung Na koda alir, alima nung onok rongnung yamaji liang.