Abhinav-i Target Olympic Podium Scheme luden toktsür

New Delhi, October 29 (Agencies): Olympic gold medallist, Abhinav Bindra-i India sorkari asayartem asoshi renemtsüba Target Olympic Podium Scheme (TOPS) luden toktsütsü lemtetba osang ka tanü Brehostibar nü shiti ajanga metetdaktsüogo.
2016 Rio Games aser 2020 Summer Olympics asoshi terenemshiba agitsüsa akümba yong pai iba luden nung züngsem ka ama shilem magitettsüsa akümba olen ka Abhinav-i tanü metetdaktsü.
“Ni Olympics asayamong asoshi kanga dang mazüngi terenemshiba agitsü tenzükba yong TOPS luden nem mapang magütsütsü akümer,” ta Abhinav-i TOPS mendenbuba, Anurag Thakur den shiti ajanga metetdaktsü.
Kasa luden nung London Olympics bronze medallist, MC Mary Kom-ia shilem magitettsüsa akümba osang jangjaogo.
Olympics asayamong nung India asoshi takokba aser konang tulu bener arutsütsü tamangba akaba asayartem nem senotsü teyari agütsütsü asoshi India sorkari iba TOPS mapatong ya tenzüka lir.
Kasa mapatong nungi Abhinav-i teyari sen crore 1.12 aser Mary Kom-i sen lakh 75 angutsü lir.
TOPS luden nung National badminton coach, Pullela Gopichand; taoba long jump asayar, Anju Bobby George aser India Sports Minister, Sarbananda Sonowal nungera züngsema lir.